Kuna kwalanda, e nza yazala yo wantu. Kansi, ayingi muna yau bakituka wantu ambi. E mbasi zankaka kuna zulu zakituka mpe mbasi zambi. Basisa e fulu kiau kuna zulu yo kwiza ova ntoto. Bavuata e nitu za wantu. Nga ozeye ekuma bavangila wo? Bazola vo basompana ye akento.

E mbasi zazi bawuta wana ye akento ana basompa. O wan’au banungunuka e ntela yo kituka mabamba-ngolo. Bazolanga nuanisa yo vonda wantu. Yave kayambula ko vo mambu mama mambi makwamanana. Muna kuma kiaki, wabaka e nzengo za fwasa wantu ambi muna kizalu. Wanokesa mvula yangolo, e nza yawonso yazala yo maza.

Kansi, vakala yo muntu mosi wambote ona watoma zolanga Yave. E nkumbu andi Noa. Wakala yo nkento yo wana tatu. E nkumbu zau Seme, Kami yo Yafete. Konso mwana wakala yo nkento andi. Yave wazola vo Noa ye esi nzo andi bavuluka muna Kizalu. Muna kuma kiaki, Yave wavovesa Noa vo katunga e nzaza yampwena yo kotesa bulu yayingi muna kati kwa nzaza kimana yalembi fwa muna maza.

Vana vau, Noa ye esi nzo andi bayantika tunga e nzaza. Mvu 50 bavanga muna yo tunga. Balanda mawonso kabavovesa o Yave muna tunga e nzaza. Ekolo batunganga, Noa walukisanga mpe o wantu mu kuma kia Kizalu. Kansi, ke bazola kunkwikila ko.

I bosi, e ntangwa ya kota muna nzaza yafwana. Yambula twazaya dina diavangama.