Isaki mvu 40 kakala miau vava kasompana yo Rebeka. Watoma kunzolanga kikilu. Kuna kwalanda, bawuta wana wole amakala. Zinsimba bakala.

O mbuta wayikilwanga vo Esau, o nleke Yakobo. Esau kavuandanga ku nzo ko, wazolanga kwenda konda e bulu. Kansi, Yakobo ku nzo kazolanga kala.

Muna lumbu yayina, o se avo ofwidi, o mbuta wavewanga tini kianene kia nsi yo tambula nzimbu zayingi. E lekwa yayi yayikilwanga vo vua. Muna kanda dia Isaki, dimosi muna vua batambula i nsilu mina Yave kasia kwa Abarayama. Esau katokanenanga nsilu miami ko. Kansi, Yakobo wazaya wo vo e nsilu miami mfunu kikilu miakala.

Lumbu kimosi, vava Esau katuka mu nkonda, wayoya kikilu kakala. Wawá e nsunga za madia mana Yakobo kalambanga yo vova vo: ‘Mfune mfwidi, dodokolo, umpana e yuma yoyo yambwaki.’ Yakobo wavova vo: ‘Ikuvana, kansi entete, unsia nsilu vo okumpana e vua diaku.’ Esau wavova vo: ‘Kivuidi vua diame mfunu ko. Olenda kwaku dio baka. Madia kaka nzolele.’ Nga Esau diambu diangangu kavanga? Ve. Esau wabembola lekwa kiamfunu mu kuma kia longa dimosi dia madia.

 Vava Isaki kakituka se nunu, e ntangwa yavana e nsambu kwa mwan’andi ambuta yafwana. Kansi, Rebeka wasadisa Yakobo ona wakala vo nleke katambula e nsambu. Vava Esau kalwaka, wafunga kikilu makasi, wavava vonda nleke andi. Isaki yo Rebeka bazola tanina Yakobo. Muna kuma kiaki, bamvovesa vo: ‘Tina, nda zingila kuna kwa Labani wa mpangi ame yavana makasi ma Esau mekuluka.’ Yakobo walemvokela luludiku lwa mase mandi, watina mu vuluza moyo andi.