Muna nsi a Usi, mwazingilanga muntu mosi wasambilanga Yave. E nkumbu andi Yobi. Mvuama kikilu kakala, wana ayingi mpe kakala yau. Muntu ambote kakala, wasadisanga asukami, akento ye wana ansona. Kansi, wau vo muntu ambote kakala, nga diadi disongele vo Yobi kadi wanana ye mambu mampasi ko?

Yobi kazaya diambu ko, kansi Satana wa Nkadi Ampemba wansianga o meso. Yave wavovesa Satana vo: ‘Nga omuene ntaudi ame Yobi? Ke vena mosi ko ofwananene yandi ova nza. Okundemvokelanga yo vanga oma mansongi.’ Satana ovutwidi vo: ‘Dialudi vo Yobi okulemvokelanga kadi okuntaninanga yo kunsambula. Wamvana lekwa yayingi nze ntoto ye bulu. Ngina ye ziku vo avo unkatwidi yawonso kena yau, ke kusambila diaka ko.’ Yave ovovele vo: ‘Olenda tonta Yobi. Kansi kumvondi ko.’ Ekuma Yave kayambulwila vo Satana katonta Yobi? Yave wakala ye ziku vo Yobi osikila ye kwikizi.

Satana wayantika twasa mpasi zayingi kwa Yobi mu kuntonta. Entete, wafila buka kia mivi bayikilwanga vo Aneseba benda yiya ngombe ye mabuluku ma Yobi. I bosi, watuma tiya twayoka mameme mawonso ma Yobi. Buka kiankaka kia mivi kiayikilwanga vo Akaladi, bayiza yiya e samo yandi. E selo yandi yawonso ana balunga-lunganga e bulu yayi bavondwa. I bosi, diambu diankaka diankenda kikilu diavangama. Wana awonso a Yobi bafwa vava nzo ina bavangilanga o nkinzi yababwila. Yobi wakendalala kikilu mu mawonso mavangama, kansi kayambula sambila Yave ko.

 Satana wazola vo Yobi kamona mpasi zayingi. Muna kuma kiaki, wazadisa nitu a Yobi ye mputa. Yobi mpasi zayingi kamonanga mu kuma kia mputa zazi. Kazaya ko e kuma kamuenanga e mpasi zazi zawonso. Kana una vo i wau, Yobi kayambula sambila Yave ko. Yave wamona mawonso mama, wayangalela kwikizi kia Yobi.

I bosi, Satana wafila wantu tatu benda tonta Yobi. Bamvovesa vo: ‘Diambu diambi wavanga kuna nsweki. Owau, Nzambi utumbidi.’ Yobi wavova vo: ‘Kiavangidi kwame diambu diambi ko.’ Kansi, Yobi wayantika yindula vo Yave wantwasilanga e mpasi zazi. Wavova vo mana Nzambi kavangidi kwa yandi, ke mansongi ko.

Toko dimosi wakala vana ndambu wayikilwanga vo Eleyu wasianga e sungididi yo wá mawonso kavovanga. I bosi, wavova vo: ‘Mawonso ovovele, ke maludi ko. Wantu ke balendi bakula ko e kuma Yave keyambulwilanga vo mambu mambi mavangama. Yave kalendi vanga mbi ko. Omonanga mawonso mebwilanga wantu yo kubasadisa vava bekalanga mu mpasi.’

I bosi, Yave wavovesa Yobi vo: ‘Akweyi wakala vava yavanga e zulu ye ntoto? Ekuma ovovelanga vo kivangidi mansongi ko kwa ngeye? Vova kaka ovovele, kansi kuzeye ko e kuma mambu mama mabwididi.’ Yobi watambulwila e mbi kavanga yo vova vo: ‘Diambi kikilu mpangidi. Owau, mbakwidi vo ngeye i Nzambi wa mpungu-ngolo. Kwa ngeye, mawonso malendakana. Undoloka mu kuma kia mana mpovele.’

Vava e ntonta zafokoka, Yave wavana diaka Yobi vimpi wambote yo kumvana lutila nkutu ina kateka kala yau. Yobi wazinga diaka mvu miayingi, wakala ye zingu kiakiese. Yave wasambula Yobi kadi wanlemvokelanga kana nkutu vava diakalanga diampasi. Nga ozolele tanginina Yobi yo kwamanana sambila Yave kana nkutu muna ntangw’a mpasi?