Mose wafila e zula kia Isaele mu mvu miayingi. I bosi, e zingu kiandi kialwaka ku mfoko. Yave wamvovesa vo: ‘Ke ngeye ko okotesa Aneyisaele muna Nsi a Nsilu. Kansi, ikuyambula vo wamona e nsi.’ Mose walomba kwa Yave vo kasola mfidi ankaka ona olunga-lunga o nkangu. Yave wamvovesa vo: ‘Wenda kwa Yosua, unzayisa vo yandi nsolele.’

Mose wavovesa nkangu vo lufwa lwandi lufinamene, Yave osolele Yosua kimana kabakotesa muna Nsi a Nsilu. Mose wavovesa Yosua vo: ‘Kumoni wonga ko. Yave okusadisa.’ I bosi, Mose watomboka kuna Mongo a Nebo, Yave wansonga e nsi ina kasila nsilu kwa Abarayama, Isaki yo Yakobo. Mose kimbuta kia mvu 120 kakala vava kafwa.

Yave wavovesa Yosua vo: ‘Sauka o Nkoko a Yodani yo kota muna nsi a Kenani. Ikusadisa nze una yasadisila Mose. E lumbu yawonso ofwete tanganga o Nsiku ame. Kumoni wonga ko. Kala yo unkabu. Wenda, wavanga mawonso ikanikini.’

 Yosua watuma alangi wole kuna mbanz’a Yeriko. Muna lusansu lulanda, tuzaya dina diababwila kuna mbanza yayi. Vava bavutuka, bavova vo yayina i ntangwa yambote ya kota muna nsi ya Kenani. Muna lumbu kialanda, Yosua wavovesa nkangu vo bakanga e funda yau. I bosi, watuma anganga ana banatanga e nkel’a kangu vo bavita kuna ntwala yakuna Nkoko a Yodani. O nkoko wazala wakala ye maza. Kansi, vava anganga badiata muna maza, vana vau e maza ma nkoko mayambula kukula, o nkoko wayuma. Anganga bayenda telama vana kati kwa nkoko yavana nkangu awonso a Isaele wasauka kuna sambu diankaka. Nga obenze vo e sivi diadi diabasungamesa dina Yave kavanga vana Mbu Ambwaki?

Kuna mfoko, una vavioka mvu miayingi, Aneyisaele bakota muna Nsi a Nsilu. Bayantika tunga e nzo ye mbanza, vata e mpatu za vinyu ye bundu yankaka. Kieleka, balwaka muna nsi yasonsanga kimvumina yo wiki.