Izebele wawá dina diabwila ngunza za Bale yo funga kikilu makasi. Watwika nsangu kwa Eleya vo: ‘O mbazi vondwa ovondwa nze una wavondele ngunza za Bale.’ Eleya wamona o wonga yo tina muna makanga. Wasamba vo: ‘E Yave kilenda diaka zizidila ko. Yambula yafwa kwame.’ Wau vo wayoya kakala, Eleya waleka vana nsi a nti.

Mbasi mosi wansikamesa yo kumvovesa kuna ngemba zawonso vo: ‘Telama, wadia.’ Eleya wamona e kende diayokwa vana matadi ye nkalu a maza. Wadia yo nua, i bosi waleka diaka. O mbasi wansikamesa yo kumvovesa vo: ‘Dia, nkuma ovuidi o mfunu mu vanga nkangalu.’ Muna kuma kiaki, Eleya wadia diaka. I bosi, wavanga nkangalu wa lumbu 40 ye fuku 40 yavana kalwaka kuna Mongo a Korebe. Ekolo kakala kwakuna, Eleya wayenda leka muna nduka. Kansi, Yave wamokena yandi. Wamvovesa vo: ‘Eleya, adieyi ovanganga okwaku?’ Eleya wavutula vo: ‘Aneyisaele ke balungisi nsilu ko una basia. Bafwasidi e ziku diaku yo vonda ngunza zaku. Owau, mono bazolele vonda.’

Yave wamvovesa vo: ‘Vaika, wenda telama vana mongo.’ Entete, tembwa kiangolo kiaviokela vana nduka. I bosi, nzakama za ntoto yo tiya. Kuna mfoko, Eleya wawá ndinga yalembama. Wafuka lose ye mvuatu andi yo telama vana mwelo a nduka. Yave wanyuvula e kuma katininanga. Eleya wavova vo: ‘Mono kaka nsidi.’ Kansi, Yave wamvovesa vo: ‘Kuna ngeye mosi ko. Vena ye 7.000 ma wantu muna Isaele ana bakinu kunsambila. Vaika wenda kusa Elesa kakala se ngunza vana fulu kiaku.’ Vana vau, Eleya wavanga dina Yave kamvovesa. Adieyi obenze, nga Yave olenda mpe kusadisa avo ovangidi mana kekuvovesanga? Elo, olenda kusadisa. Yambula twazaya diambu dimosi diavangama vava e mvula ke zanokanga ko muna nsi.