Luyalu lwa Asuri lwabaka kintinu kia makanda kumi ma Isaele. Owau, Sankerebe wa ntinu a Asuri wazola mpe baka kintinu kia makanda mole ma Yuda. Wayantika kutumuna mbanza za Yuda imosi imosi. E mbanza ina kasia kikilu o meso, i mbanza Yerusaleme. Kansi, Sankerebe kazaya wo ko vo Yave wataninanga Yerusaleme.

Kizekeya wa ntinu a Yuda wavana Sankerebe nzimbu zayingi kimana kalembi baka Yerusaleme. Kana una vo Sankerebe watambula e nzimbu, watuma makesa mandi benda nuanisa Yerusaleme. Ekolo makesa ma Asuri bafinamanga kota muna mbanza, o nkangu wamona wonga. Kizekeya wabavovesa vo: ‘Ke numoni wonga ko. Makesa ma Asuri bavuidi nkuma, kansi o Yave okutuvana nkuma ulutidi owu bena wau.’

Sankerebe watuma Rabesake wa nkunzi andi kuna Yerusaleme mu kwenda sakanena nkangu. Rabesake watelama kuna mbazi a mbanza yo kaza vo: ‘Yave kalendi kunusadisa ko. Ke nuyambula ko vo Kizekeya kanuvuna. Ke vena nzambi ko olenda kunutanina vana moko meto.’

Kizekeya wayuvula kwa Yave dina kafwete vanga. Yave wamvutula vo: ‘Kumoni wonga ko wa mana Rabesake kavovele. Sankerebe ke kota mu Yerusaleme ko.’ Kuna kwalanda, Kizekeya watambula nkanda miatwika Sankerebe. E nkanda miavovanga vo: ‘Dimbula e vuvu una kiau. Yave ke kutanina ko.’ Kizekeya wasamba vo: ‘E Yave, dodokolo diaku, utuvuluza kimana awonso bazaya wo vo ngeye kaka i Nzambi akieleka.’ Yave wamvovesa vo: ‘O ntinu a Asuri ke kota mu Yerusaleme ko. Itanina e mbanz’ame.’

Sankerebe wakala ye vuvu vo okutumuna e mbanza Yerusaleme. Kansi lumbu kimosi muna  fuku, Yave watwika mbasi kuna kwakala makesa ma Asuri. E mbasi yayi yavonda 185.000 ma makesa. O ntinu Sankerebe wavidisa makesa mana masunda o nkuma. Kakala diaka ye dina kavanga ko, wavutuka kuna nzo ye ntantu muna ntima. Yave watanina Kizekeya ye mbanza Yerusaleme nze una kasia nsilu. Kele vo wakala muna Yerusaleme, nga wadi bund’e vuvu muna Yave?