Vakala ye Dumbelele kimosi kiazingilanga kuna Suria, vala ye nsi andi. Wakutumunwa vana moko ma mase mandi kwa makesa ma Suria yo kituka se ntaudi a nkento a mfumu a makesa wakala ye nkumbu a Namani. E dumbelele kiaki Yave kasambilanga kana una vo wantu ana kazinganga yau ke basambilanga Yave ko.

Namani kimbevo kia wazi kayelanga, mpasi zayingi kamonanga. E dumbelele kiaki wazola vo kansadisa. Wavovesa nkaz’a Namani vo: ‘Nzeye ona olenda sasula kimbevo kia nkaz’aku. Kuna Isaele, kuna ye ngunz’a Yave una ye nkumbu a Elesa. Olenda wuka nkaz’aku.’

O nkaz’a Namani wazayisa Namani dina kavoveswa kwa dumbelele. Namani wavanganga mawonso muna sasuka. Muna kuma kiaki, wayenda kuna nzo a Elesa kuna Isaele. Namani wavingilanga vo Elesa kantambula nze Mfumu. Kansi, vana fulu  kia kwiza mokena yandi, Elesa watuma selo kiandi kenda kayisa Namani yo kunzayisa vo: ‘Wenda kuna Nkoko a Yodani, wayowela nkumbu nsambwadi. I bosi, kimbevo kiaku kisasuka.’

Namani wakendalala kikilu. Wavova vo: ‘Edi yabenze vo ngunza ndioyo okunsasula vava kesamba kwa Nzambi andi yo nikuna moko mandi oku ngina. Owau mona kevovesanga vo ngienda yowela kuna nkoko mia Isaele. Tuvuidi nkoko miambote kuna Suria. Ekuma kilendi kwenda yowelela mu nkoko mieto ko?’ Namani wafunga kikilu makasi yo vaika muna nzo a Elesa.

E selo ya Namani bansadisa kimana katoma yindula. Bamvovesa vo: ‘Kele vo bavovesa wavanga diambu dianene muna sasuka, kwadi dio vanga ko? Dina o ngunza kavovese wavanga diambu diakete kwandi. Nga kulendi dio vanga ko?’ Namani wawila selo yandi. Wayenda kuna Nkoko a Yodani yo kuyituba muna maza nkumbu nsambwadi. Vava Namani kavaika muna maza mu nkumbu wansambwadi, e kimbevo kiandi kiasasuka emvimba. Wayangalala kikilu yo kwenda kwa Elesa mu kumvutula matondo. Namani wavova vo: ‘Owau nzeye wo vo Yave i Nzambi akieleka.’ Aweyi obenze kamona dumbelele kia mwisi Isaele vava Namani kavutuka yo vimpi wambote?