KUNKU KIA 7
Aki Nani Besambilanga e Nsambila Yaludi?
1. Adieyi tufwete vanga muna yangidika Nzambi?
MUNA vwa e ngwizani ambote ya zola yo Nzambi, ke tufwete kala kintwadi ko ye nsambila zaluvunu. Tufwete sambila e nsambila yaludi. O unu muna nz’amvimba ulolo wa wantu mu vanga wo se bena.
2. Mu nsi kwa balenda solokela a Mbangi za Yave ye nkia salu besalanga?
2 Nze una diateka vovwa muna Nkand’a Nzambi, asambidi aludi se “ndong’ayingi” yituka “muna zula yawonso, yo makanda ye nsi, ye ndinga.” (Lusengomono 7:9) Mazunda ma Mbangi za Yave muna 235 ma nsi besadisanga akaka mu longoka e nzila zansongi za Yave ye dina kevavanga.
Una Balenda Zayilwa Asambidi Aludi
3. A Mbangi nani besambilanga, ye nkia mpila nsambila bevenganga?
3 A Mbangi bazeye wo vo Yave kaka ofwene sambilwa. Ke bezolanga sambila teke ko yovo konso fwaniswa kia nsambila. (1 Yoane 5:21) Ke besambilanga amafwa ko muna kubayimbidila yovo kala entwadi mu miak’e nkembo misanisinanga tukwikilu twa nsambila za luvunu ye “malongi ma nkwiya.” (1 Timoteo 4:1) Kansi, befiaulwisanga awana bafwidilu e yitu, muna kubazayisa e nsilu a Nzambi wa lufuluku lwa mafwa lukala muna paradiso ova ntoto.— Yoane 5:28, 29; Mavangu 24:15.
4. Nkangu a Nzambi aweyi bebadikilanga e mpandu?
4 A Mbangi ke besadilanga mpandu ko, kindoki, yovo nkisi, kadi bazeye wo vo mambu mama kwa Nkadi Ampemba matuka. Ke bebundanga vuvu mu lutaninu lwa mpandu ko—e vuvu kiau kwa Yave kina.— Ngana 18:10.
5. A Mbangi za Yave “ke ba nza ko,” mu nkia mpila?
5 O Yesu wavova vo alongoki andi “ke ba nza ko.” (Yoane 17:16) O Yesu wavenga kuyisia mu mambu ma tuyalu twa lumbu yandi. (Yoane 6:15) Diau adimosi mpe a Mbangi ke bekotanga mu mambu ma tuyalu ko, ma mpambani za zula, yovo vava etunda mu nza yayi. Kansì tu, befutang’e mpaku yo lemvokela nsiku mia nsi zina bezingilanga.— Yoane 15:19; Roma 13:1, 7.
6. Nkia luludiku mu kuma kia longo ye vambana kwa longo belemvokelanga e selo ya Nzambi?
6 Wau vo a Mbangi za Yave nsiku mia luyalu belemvokelanga, besianga sungididi vo o tongo twau twakala twasonama muna nkanda mia luyalu. (Tito 3:1) Belemvokelanga luludiku lwa Nzambi i mbenga bemengang’o sompa akento ayingi. (1 Timoteo 3:2) Vana ntandu, wau vo belemvokelanga nsiku mia Nkand’a Nzambi muna zingu yau, e tongo twa selo ya Nzambi ke tuluta vambananga ko.
7. A Mbangi aweyi besongelang’o zola muntu yo nkw’andi?
7 A Mbangi bezolananga muntu yo nkw’andi. E zola kwa mpila yayi ye yina besonganga kwa Nzambi yikubayikakesanga muna untwadi wakieleka wa kimpangi kana una vo wantu a zula ye makanda maswaswana. Vava kibwanga sumbula yovo mpasi zivavanga lusadisu a Mbangi bezabuziokang’o sadisa muntu yo nkw’andi. A Mbangi besongang’o zola muna mpila zingu kiau.—Yoane 13:35.
Ja Mbangi za Yave bayikana mu kintwadi kia wan’angudi muna nza yawonso
8. Nkia mavangu mambi bevengang’o nkangu a Nzambi?
8 Nkangu a Yave besianga ngolo mu zingila muna unsongi. Bevenganga wivi, luvunu, zumba, nkolwa malavu ye yinkita y’eloko. Akala ke bewandanga akazi au ko. Akaka bavanganga mambu mama una ke bakitukidi Mbangi ko, kansi muna lusadisu lwa Nzambi bayambula mavangu mama. ‘Basukulwa’ vana meso ma Nzambi.— 1 Korinto 6:9-11.
Avangi a Luzolo lwa Nzambi
9. Aweyi uvovanga nkand’a mosi mu kuma kia mabundu ma mwanda omu Afrika?
9 Mabundu mayingi mevovanga vo e ludi kwa yau kina. Nanga bevanganga mavangu mankuma muna kwikidisa e mvovo miau. Kasikil’owu, nkanda mosi wavova mu kuma kia mabundu meyikilwanga vo ma mwanda oku Afrika: “E salu kia kinganga nkisi ye kia mpandu owau [buka kia mpa kia Akristu] besalanga kio. . . Bevovanga vo masivi bevanganga yo sakula mambu. Angunza zau mona-meso besonganga yo sasila e ndozi. Besadilanga maza ma nsambu, mazi mavauka, ntoto ampolo, vela, yoka titi yansunga muna wuka yo vengesa mayela.”
10, 11. Mu nkia kuma oma meyikilwanga vo masivi o unu ke mesongelanga ko vo e dibundu kwa Nzambi diatuka?
10 Esi nsambila zozo bevovanga vo o masivi i sinsu kisonganga vo e nsambil’au yasambulwa kwa Nzambi. Kansi, oma beyikilanga vo masivi ke mesonganga ko vo e nsambila au itondwanga kwa Yave. O Satana ovananga e nkuma kw’asambidi a luvunu mu vanga ‘mavangu ma nkuma.’ (2 Tesalonika 2:9) Vana ntandu, Nkand’a Nzambi wazayisa vo o masivi mena vo lukau lwa Nzambi, ye ungunza, ndinga, zayi, “suka usuka.”—1 Korinto 13:8.
11 O Yesu walukisa vo: “Ke yandi ko okumpovesanga vo, e Mfumu, e Mfumu, i yun’okota muna kintinu ki’ezulu; ndiona kak’ovangang’o luzolo lu’Es’ame wina kun’ezulu. E lumbu kiakina, engi bekumpovesa vo, e Mfumu, e Mfumu, ke yeto ko twasakwila muna nkumbu aku, yo muna nkumbu aku twavaikisila nkwiya, yo muna nkumbu aku twavangila mavangu mayingi mankum’e? I bosi ikubakiesesela wo vo, kianuzaya nkutu ko: nukatuk’ova ngina, yeno avangi a umpumbulu.”— Matai 7:21-23.
12. Aki nani bekota muna Kintinu ki’ezulu?
12 Nani ozevo okota muna Kintinu ki’ezulu? Awana bevanganga luzolo lwa Yave.
Ateleki a Kintinu kia Nzambi
13. Nkia salu kavan’o Nzambi kwa nkangu andi basala o unu, aki nani besalanga kio?
13 Alweyi i luzolo lwa Nzambi kwa nkangu andi o unu? O Yesu wavova vo: “E nsangu zazi zambote za kintinu zisamunwa muna nza yawonso, muna umbangi kwa zula yawonso; i bosi iluak’e mbaninu.” (Matai 24:14) Ekiaki i salu besalanga a Mbangi za Yave y’etima diawonso.
14. Nki i Kintinu kia Nzambi, ye nani oyala muna Kintinu kiokio?
14 Muna “nza yawonso,” a Mbangi za Yave besamunanga Kintinu kia Nzambi vo i luyalu lw’ezulu luyala e nza yawonso muna unsongi. Belonganga vo o Yave wasola Kristu Yesu mu kala Ntinu wa Kintinu kiokio kumosi ye 144.000 keyala yau entwadi ana basolwa vana vena wantu.—Daniele 7:14, 18; Lusengomono 14:1, 4.
15. E Kintinu nki kifwasa?
15 A Mbangi besadilanga Nkand’a Nzambi mu vova kwa wantu vo e Kintinu kia Nzambi kifwasa e nza yawonso ya Satana. E nsambila aluvunu ifokoka ye malongi mandi mekululanga zitu wa Nzambi yo kembelesa Nkadi Ampemba! (Lusengomono 18:8) Tuyalu twawonso mpe twa wantu tusianga Nzambi e kitantu tufwaswa!— Daniele 2:44.
16. Aki nani bekala nkangu a Yesu Kristu, ye akweyi bezingila?
16 Vana ntandu, a Mbangi za Yave bazeye wo vo o Kristu Yesu otwasa nsambu zayingi kw’awonso bevanganga mana kevavang’o Nzambi. Bekala se nkangu andi ova ntoto. O Nkand’a Nzambi usianga nsilu vo: “Kadi okôla nkondami vava kekaza; yo nsukami ona kena ya nsadisi ko. Omwena nsukami yo nkondami e nkenda, yo vuluza mioyo mi’akondami.”— Nkunga 72:12, 13.
17. Aki nani kaka besamunanga Kintinu kia Nzambi?
17 Ke vena nkangu akaka ko uvanganga luzolo lwa Nzambi lwa samuna e nsangu zambote za Kintinu. A Mbangi za Yave kaka besamunanga Kintinu kia Nzambi muna nza yawonso.