1, 2. Nkia nona kisonganga o mfunu a lekwa kilenda zenga mpaka mu mambu ma nsambila?

AWEYI tulenda zayila Nzambi? Nga tufwete teka fimpa ulolo wa mabundu mawonso? Ediadi ke dilendakana ko. Kana nkutu tulenda wo vanga, aweyi tulenda zayila elongi dialudi?

² Kieleka, wau vo vena ye ngindu za mpila mu mpila mu kuma kia Nzambi, tufwete vava una tulenda zayil’e ludi kina kifwete kwikila o wantu. Muna bong’e nona: Badika vo vabwidi mpaka kuna zandu yo nsumbi yo nteki mu kuma kia lambuka kwa nlele. O nteki vo o nlele meta tatu una, kansi o nsumbi omwene vo ke wafwana zitatu ko. Aweyi ulenda fokolwelwa e mpaka zazi? Bafwete teza o lambuka kwa nlele wowo muna nsinga wa bakila e tezo.

3. Ekuma wasonekenwa o Nkand’a Nzambi?

³ Nga vena ye nsinga wa bakila e tezo yovo má kiasikidiswa kilenda sadilwa muna sia e nzengo mu mambu ma nsambila? Elo vena, i Nkand’a Nzambi. O Nzambi wasonekesa Nkand’a Nzambi kimana vo mwawonso o wantu bazaya e ludi mu kuma kiandi. Mazunda ye mazunda ma Nkand’a Nzambi mianietekwa. O Nkanda mvimba yovo etini yandi yisekwelo kala mu tezo kia 2.100 za ndinga. Ozevo, konso muntu olenda tanga e ludi mu kuma kia Nzambi muna ndinga a yandi kibeni.

4. O Nkand’a Nzambi nkia mambu kekutuzayisanga?

⁴ O Nkand’a Nzambi i lukau lusundidi o  wete kavan’o Nzambi. Usongang’o mambu mena vo kondwa kwa nkanda wau ke twadi mo zaya ko. Ukutovovesanga mambu ma ana bezinganga muna nza ya kimwanda. Ukutuzayisanga e ngindu za Nzambi, kiwuntu kiandi, ye makani mandi. Uzayisanga e nkal’andi yo wantu se vioka mazunda ma mvu. Uzayisanga mambu mebwa kuna sentu. Usonganga mpe una tulenda sololwel’e nzila ya moyo a mvu ya mvu.

5. Nkia diambu disonganga vo o Nkand’a Nzambi un’e ngwizani ye ngangu za nza?

⁵ Vena ye kuma yayingi tufwete kwikidila vo o Nkand’a Nzambi i Diambu dia Nzambi kieleka. E diantete o Nkand’a Nzambi ngwizani una ye mona dia mambu ma ngangu za nza. Muna ntama, o wantu bakwikilanga vo e nza va ntandu a má yazangama. Kasikil’owu, kuna Afrika ya Este wantu bakwikilanga vo nioka zole zanene zazingama, imosi kuna nsi imosi va ntandu, i besikininanga e Nza. Konso nioka una ye 3.500 ma nzingumuka. Kansi, se vioka 3.500 za mvu o nsoneki a Nkand’a Nzambi wasoneka edi din’e betela ye mona dia ngangu za nza vo Nzambi “wamanika nza muna nkatu.”—Yobi 26:7.

6. Akieyi i ziku kiampwena kisonganga vo o Nkand’a Nzambi kwa Nzambi watuka?

⁶ E ziku kianene kia sia vo o Nkand’a Nzambi kwa Nzambi watuka i mpila kesongelanga mambu mevangama kuna sentu ye sikididi kiawonso. Nswaswani ye ungunza wa wantu, o Nzambi ozeye oma ma kusentu; mawonso kevovanga melungananga.

7. Nkia ungunza wa Nkand’a Nzambi walungana kuna nkulu?

⁷ Mazunda ma ungunza wa Nkand’a Nzambi walungana kuna nkulu. Kasikil’owu, vitila 700 za mvu o Nkand’a Nzambi wavova ye ziku kiawonso vo o Yesu kuna mbanza Beteleme kewutukila, i wau mpe wavangama. (Mika 5:2; Matai 2:3-9) Vana ntandu a ungunza wayingi mu kuma kia Yesu, o Nkand’a Nzambi wazayisa mpe vo kwa ndumb’a mwenze kewutwa yo yekolwa muna palata 30. O ungunza wau mpe walungana. Kieleka, o muntu kalendi sakula mambu mama ko!— Yesaya 7:14; Zakariya 11:12, 13; Matai 1:22, 23; 27:3-5.

8. Nkia ungunza wa Nkand’a Nzambi ulungananga o unu, ye adieyi usonganga?

⁸ Ungunza wayingi wa Nkand’a Nzambi  ulungananga omu lumbu yeto. O waka ungunza i wau:

• “E zula kitelamena zula, e kintinu ye kintinu: mukala nzakama zangolo za ntoto, o muma mwakàkakàka mvengele ye vuku.”— Luka 21:10, 11.

• O “umpumbulu” uwokela—Matai 24:12.

• “Muna lumbu yambaninu . . . wantu bekal’akwa kuzola, minzola-nzimbu, . . . akolami ese yo ngudi, . . . minkondwa-volo, akwa lunzi, mindembi zola mawete, . . . akwa lungumvi-ngumvi, azodi ekembo ke mu Nzambi ko.”— 2 Timoteo 3:1-5.

Nga kukwikidi ko vo mambu mama mu vangama mena o unu? E ziku ye kwikizi kia ungunza wa Nkand’a Nzambi usonganga vo o Nkand’a Nzambi ke mpasi nkanda ko. I Diambu diavumunwinwa dia Nzambi!— 2 Timoteo 3:16.

9, 10. Adieyi disonganga vo o Nzambi kayambula ko vo o wantu basoba Nkand’a Nzambi?

⁹ Badika vo ongeye u mfumu a kompani, osonekene muna papela e nsiku mina bafwete lemvokela asadi aku. Avo ntantu aku osobele mana wasoneka adieyi ovanga? Nga kuvunzuna mo ko yo soneka oma makieleka? Diau adimosi mpe o Nzambi kayambula ko vo o wantu basoba e ludi kina muna Nkand’a Nzambi una vo i Diambu diandi.

¹⁰ Awana bevavang’o soba malongi ma Nkand’a Nzambi ke besikilanga ko. Vava tutezanisanga e sono ya Nkand’a Nzambi tusadilang‘o unu ye yina yantete tumonanga vo diau adimosi kwandi. Ediadi, disonganga vo muna mvu miami miawonso o Nkand’a Nzambi ke usobele ko.