Kwa Nteleki a Kintinu:

Yindula vo umosi muna antumwa batelamene vana Mongo a Olive. Vana vau Yesu omonekene vana wina. Vitila katomboka kuna zulu, ovovele vo: “Nutambula nkuma vava o mwand’avelela ukwiza omu yeno, nukala mbangi zame muna Yerusaleme, muna Yuda yawonso ye Samaria yakuna nsuk’a nza.” (Mav. 1:8) Adieyi wadi vanga?

Nanga wadi tokana kwayingi mu kuma kia salu kiaki kiampwena yo kukiyuvula vo, wau vo tu buka kiakete kia alongoki, aweyi tulenda sila umbangi “yakuna nsuk’a nza?” Nanga osungamene lulukisu Yesu kavana muna fuku vitila lufwa lwandi, oku vo: “O ntaudi kasundidi mfumu andi ko. Avo bambangika, oyeno mpe bekunubangika; avo balunda e diambu diame, e diambu dieno mpe belunda dio. Bekunuvanga mambu mama mawonso mu kuma kia nkumbu ame, kadi Ndiona wantuma ke banzeye ko.” (Yoa. 15:20, 21) Ekolo oyindulanga mvovo miami, olenda kukiyuvula: ‘Aweyi ndenda sila umbangi una ufwene muna ntonta ye lubangamu lwalu?’

O unu mpe, e yuvu yayi ikututokanesanga. Wau vo tu Mbangi za Yave, yeto mpe tuna ye mbebe ya sila umbangi una ufwene “yakuna nsuk’a nza,” kwa “wantu a zula yawonso.” (Mat. 28:19, 20) Aweyi salu kiaki kilenda lungisilwa wau vo tunuananga ye lubangamu lwalu lwateka sakulwa?

Nkand’a Mavangu ma Zintumwa, uvuidi lusansu lwakiese usonganga una antumwa ye akwau Akristu muna tandu kiantete balungisila e salu kiau muna lusadisu lwa Yave. O nkanda wau otanganga, wakubikwa muna kusadisa mu toma longoka lusansu lwalu yo mona kiese kia mambu mana mabwa masonama mo. Osinga mona vo vena ye mambu mafwanana vana vena selo ya Nzambi muna tandu kiantete ye nkangu andi o unu. E mambu mama ke matadidi kaka salu tusalanga ko kansi matadidi mpe e mpila nkubika eto isadilanga. Kalukatikisu ko vo obadika e mfwanani zazi, disiamisa lukwikilu lwaku muna Yave wa Nzambi vo okwamanana fila e ndambu a nkubik’andi ina ova ntoto.

Tusambanga kimana e longi dia nkanda wau wa Mavangu, diasiamisa e vuvu kiaku muna lusadisu lwa Yave yo zaya vo muna mwand’andi avelela okusadisa. Ozevo, muna mpila yayi, okwamanana sila Kintinu kia Nzambi ‘umbangi una ufwene,’ yo sadisa akaka basolola nzil’a luvuluzu.—Mav. 28:23; 1 Tim. 4:16.