Sadila e nto zakieleka za mambu. E longi diaku difwete kala e ngwizani ye Diambu dia Nzambi. Tangilanga e mvovo mia sono muna kati kwa Nkand’a Nzambi, avo dilendakana. Avo nto zankaka za mambu ozolele sadila nze nkanda, zulunalu yovo lusansu, diambote wateka fimpa mu zaya kana vo e mambu mama makieleka yovo ve.

Sadila e nto za mambu una ufwene. Vava osasilanga e sono, mana ovova mafwete kala e ngwizani ye sono yankaka ya Nkand’a Nzambi kumosi ye nkanda mivaikisanga “ntaudi akwikizi yo lulungalalu.” (Mat. 24:45) Avo nkanda mia ngangu za nza osadila, mana ovova mafwete kala e ngwizani ye ngindu za nsoneki.

Toma sasila e diambu. Avo otangidi sono kia Nkand’a Nzambi yovo yika nto yankaka ya mambu, yuvula e yuvu kuna ndekwa yovo sadila e nona mu sadisa awana bekuwanga batoma bakula e diambu.