NKIA nswaswani omwene mu fwaniswa kiaki? Wantu bena vo. I yakala yo nkento antete. Nani wabavanga? Nzambi. Ng’ozeye nkumbu andi? Yave. O Yakala yo nkento antete bayikilwanga vo Adami yo Eva.

Tala una Yave wa Nzambi kavangila Adami. Wabonga mbundukutu a ntoto, yo vanga muntu. Umvumunwini muna mazunu, o Adami okitukidi se wamoyo.

Yave wa Nzambi wavana salu kwa Adami. Wamvovesa vo kavana bulu yawonso e nkumbu. Nanga, ntangwa diavava kwa Adami muna talanga e bulu yo vava nkumbu zambote za kubayikila. Ekolo kabavananga e nkumbu diambu kayantik’o mona. Ng’ozeye kana nkia diambu?

Bulu yawonso nwole nwole yakala, ekoko ye nkento. Vakala ese ye ngudi a nzau, ese ye ngudi a nkosi. Kansi, Adami kakala ye nkento ko. Ozevo, o Yave olekese Adami wosola kia tulu, obongele luvati lwa mpati zandi. Vo i luvati luna kakatwidi muna Adami, o Yave i kavangidi nkento. Okitukidi se nkaz’andi.

O Adami kiese kiayingi kamona. Eva kiese mpe kamona mu zingila muna mpatu yoyo yambote. Badi wuta wana yo zingila kumosi mu kiese.

O Yave wazola vo Adami yo Eva bazinga yakwele mvu. Wazola vo bakitula ntoto wawonso se fulu kiambote nze mpatu a Edene. Adami yo Eva bayangalala kikilu vava bavoveswa mu vanga wo. Nga wadi yangalela kitula ntoto se mpatu ambote? Kansi, e kiese kia Adami yo Eva ke kiazingila ko. Tutala kana nkia kuma.