AVO olwakilu kwa muntu anda olwakanga yamu nludi a nzo aku aweyi okumbadikila? Muntu ndioyo ndangula. Vakala ye ntangwa andangula bazingilanga ova nza. Nkand’a Nzambi uvovanga vo mase mau mbasi z’ezulu. Aweyi diavangamena ediadi?

Sungamena dio vo Satana wa mbasi ambi wakwamanan’o vang’o bi. Wavukumuna nkutu mbasi za Nzambi bavanga o bi. Kuna kwalanda, akaka muna mbasi zazi bayantik’o wila Satana. Bayambula salu kabavan’o Nzambi kun’ezulu. Bakulumuka ova ntoto, yo vwata nitu za wantu. Ng’ozeye ekuma?

Nkand’a Nzambi uvovanga vo wana awaya a Nzambi miote mi’akento bamona ova ntoto yo zola zinga yau entwadi. Ozevo, bakulumuka va ntoto yo sompa akento awaya. Nkand’a Nzambi uvovanga vo evangu diadi diambi kikilu diakala, kadi Nzambi kavanga mbasi mu zingila va ntoto ko.

Vava bayantik’o wuta, wan’au baswaswana bakala. Kuna lubantiku nanga ke vakalanga nswaswani beni ko. Kansi, bakulanga kwayingi yo kumama yavana bakituka s’andangula.

Andangula wantu ambi bakala. Wau vo basunda vonga, ntela ye ngolo babangikanga akaka. Bavukumunanga wantu mu vanga mambi nze yau.

Kanoke, wafwa, kansi vakala ye muntu akaka ova ntoto wavanganga mambu mambote. Nkumbu andi Noa. Wavanganga mana kazola o Nzambi.

Lumbu kimosi Nzambi wavovesa Noa vo e ntangwa yafwasa yimpumbulu yawonso ifwene. Kansi, ovuluza Noa, y’esi nzo andi ye bulu. Yambula twatala una kavangila wo o Nzambi.