TALA Kaini yo Abele ovava. Banungunukini e ntela. O Kaini se mvati a nsengo. Wakunanga masa, bundu ye nkovi.

Abele se mvungudi a mameme. Wazolanga lunga-lunga wan’a mameme. Mawokelanga. Ke kolo ko, Abele wakala y’ekambi dia mameme.

Lumbu kimosi, Kaini yo Abele bavana lukau kwa Nzambi. Kaini watwasa mbongo a kiana. Vo i Abele watwasa ememe disundidi owete. Yave wayangalela Abele yo lukau luandi. Kansi, kayangalela Kaini ko yo lukau luandi. Ng’ozeye ekuma?

Ke sia ko vo lukau lwa Abele lwasunda lwa Kaini o wete. Kansi, Abele muntu ambote kakala. Wazolanga Yave ye mpangi andi. O Kaini muntu ambi; kazolanga mpangi andi ko.

Nzambi, wavovesa Kaini kasoba fu yandi. Kansi, kanwila ko. Wafunga makasi wau vo Nzambi wazola Abele. Ikuma, wavovesa mpangi andi vo, “Twenda kuna kiana.” Una bakedi yau kaka muna kiana, o Kaini ovondele Abele wa mbunzi andi. Diambu diambi kikilu kavanga Kaini.

Kana una vo Abele wafwa, Nzambi wakinu kunsungamena. Abele muntu ambote kakala, o Yave kevilakananga wantu ambote ko. Yave wa Nzambi ovutula Abele o moyo. Kefwa diaka ko. Ozinga ova ntoto yakwele mvu. Nga ke diambote ko dia zaya wantu nze Abele?

Nzambi keyangalelanga wantu nze Kaini ko. Ozevo, vava Kaini kavonda mbunzi andi, Nzambi wantumba. Wamvovesa vo kenda zingila kwa nda y’esi nzo andi. Vava kayenda zingila kwakaka wanata mpangi andi ankento, wakituka se nkaz’andi.

Kuna kwalanda, Kaini yo nkaz’andi bayantik’o wuta wana. Wana akaka amakala y’amakento a Adami yo Eva basompaziana yo wuta wana. Ke kolo ko wantu bayantika wokela ova ntoto. Tusinga zaya maka mambu mu kuma kiau.