VAVA wantu bayantik’o wokela ova ntoto ndonga mu yau bavanganga oma mambi nze Kaini. Kansi, vakala ye muntu waswaswana. Nkumbu andi Kanoke. Nkwa unkabu kakala. Amfinangani zandi awonso mambi bavanganga. Kansi, Kanoke wakwamanan’o sadila Nzambi.

Ng’ozeye ekuma wantu bavangilanga ulolo wabi muna ntangwa yayina? Se yindula, nani wavukumuna Adami yo Eva mu kolamena Nzambi yo dia bundu kia nti kabasima vo ke badie ko? Mbasi ambi. Muna Nkand’a Nzambi oyikilwanga vo Satana. Ovavanga vo awonso bavangang’o bi.

Lumbu kimosi Yave wa Nzambi watuma Kanoke kavova kwa wantu diambu dina ke bazola wa ko. Wabavovesa vo: ‘Nzambi ofwasa wantu awonso bevangang’o bi.’ Wantu bafunga makasi muna mvovo miami. Bavava vonda Kanoke. Ozevo, unkabu wayingi diavavanga kwa Kanoke mu vova kwa wantu mana kevanga o Nzambi.

O Nzambi kayambula ko vo Kanoke kazinga kwayingi vana vena wantu awaya ambi. Kanoke mvu 365 kaka kazinga. Ekuma tuvovele vo “mvu 365 kaka”? Ekuma kadi, muna lumbu yayina wantu bakumama bakalanga yo zinga kwayingi ka nze tandu kiaki ko. Kasikil’owu, Metuselake wa mwan’a Kanoke wazinga mvu 969.

Vava kafwa Kanoke wantu basak’o vanga mambi. Nkand’a Nzambi uvovanga vo: ‘Konso ngindu za ntima miau zambi kaka, e lumbu yawonso,’ ikuma vo, ‘e nza yazala yo umpumbulu.’

Ng’ozeye ekuma e nza yazadila yo umpumbulu muna lumbu yayina? Satana wasolola ndekwa zampa za fila wantu mu vanga mambi. Tulongoka ediadi mun’elongi dilanda.