TALA ntoto ovava. Mawonso mambote kikilu. Tala e titi, e nti, mvuma ye bulu. Ng’ozeye nzau ye nkosi?

Aweyi yayizila e mpatu yayi yambote? Yambula twawa una Nzambi kakubikila ntoto mu kuma kieto.

Entete, o Nzambi wazadisa o ntoto ye titi ya nse. I bosi, wavanga mpila zawonso za nti, miakete, miandwelo ye miampwena, muna viengesa o ntoto. Kansi, mayingi mivanganga ke viengesa kaka ntoto ko. Miayingi muna nti miomio bundu yambote ya dia miyimanga.

Oku kwalanda, Nzambi wavanga mbizi mu siensia muna maza, ye nuni zitimuka mun’ezulu. Wavanga mbwa, mbumba, mvalu; bulu yampwena ye yakete. Bulu yizingilanga kumosi yo wantu. Nga ke diakiese ko vo Nzambi wavanga mawonso mama mu kuma kieto?

Kuna mfoko, Nzambi wakitula fulu kimosi ova ntoto se kiambote. Wayikila kio vo mpatu a Edene. Mawonso mambote kikilu makala. Nzambi wazola vo e nza yawonso yakituka se fulu kiambote nze mpatu ina kavanga.

Kansi, tala diaka muna mpatu yayi. Ng’ozeye dina kamona o Nzambi vo i diakondwa? Yambula twatala.