LEKWA yawonso yambote tuna yau kwa Nzambi yatuka. Wavanga ntangwa muna kutuvan’o ntemo mu mwini. E ngonde ye ntetembwa mu kutuvana ntemo wandwelo mu fuku. Wavanga e nza kimana twazingila vo.

Kansi, e ntangwa, ngonde, ntetembwa ye ntoto ke yau i lekwa yantete ko kavanga o Nzambi. Nkia lekwa yantete kavanga? Entete, Nzambi wavanga wantu bafwanana yo yandi. Katulendi kubamona ko, nze una katulendi mona Nzambi ko. Muna Nkand’a Nzambi beyikilwanga vo mbasi. Nzambi wavanga mbasi mu zinga yo yandi kun’ezulu.

Mbasi antete kavang’o Nzambi wamfunu kikilu. Mwan’antete a Nzambi. Wasala kumosi yo S’andi. Wasadisa Nzambi mu vanga lekwa yawonso, ntangwa, ngonde, ntetembwa ye ntoto mpe.

Aweyi wakala o ntoto una ke wavangilu ko? Kuna lubantiku ke vakala muntu ko ova ntoto. Ke vakala ye ma ko, maza mankatu makala vo. Kansi, Nzambi wazola vo wantu bazingila ova ntoto. Ozevo, wayantik’o vanga e lekwa mu kuma kieto. Adieyi kavanga?

Entete, e nza ntemo yavavanga. O Nzambi wavanga e ntangwa yavanang’o ntemo ova ntoto. Obulanisi ntemo ye tombe kimana vakala mwini yo fuku. I bosi, wavaikisa ntoto ayuma vana ntandu a maza.

Kuna lubantiku ke vakala ma ko ova ntoto. Wakala nze fwaniswa omwene vava. Ke vakala mvuma ko, nti yovo bulu. Ke vakala mpe mbizi za maza ko. Nzambi salu kiayingi kakala kiau mu kitula ntoto se fulu kiambote kwa wantu ye kwa bulu mu zingila vo.