KUNA nima Kizalu vakala mbanza mosi yazingilanga wantu yayikilwanga vo Ure. Mbanz’ambote yakala ye nzo zatoma tungwa. Kansi, nkangu wazingilanga mo nzambi zaluvunu basambilanga. I wau mpe bavanganga kuna Babele. Esi Ure ye Babele ke bakala nze Noa yo mwan’andi Seme ko ana basadilanga Yave.

Kuna nima kizalu vioka mvu 350, Noa wa nkwa kwikizi wafwa. Vioka mvu miole, vawutuka muntu oyu omwene vava. Wakala se muntu ambote kuna kwa Nzambi. E nkumbu andi Abarayama. Wazinganga ye nzo andi muna mbanza Ure.

Lumbu kimosi Yave wavovesa Abarayama vo: ‘Katuk’omu Ure, y’omu yitu yaku, wenda kuna nsi ikusonga.’ O Abarayama nga walemvokela Nzambi yo sisa mawete mawonso ma Ure? Elo, kadi Abarayama walemvokelanga Nzambi yo kituka se nkundi a Nzambi.

Yitu yakaka ya Abarayama bayaluka yandi kumosi vava kasisa Ure. Tera w’es’andi yo Loti wa mwana mpangi andi a yakala yo Sara wa nkanz’andi. Vava baluaka muna zunga kiayikilwanga vo Karani, o Tera ofwidi. Kwanda bakala ye Ure.

Vioka lumbu, Abarayama ye nzo andi basisa Karani yo kwenda ku nsi yayikilwanga vo Kenani. Kwakuna, o Yave wamvovesa vo: ‘Eyayi i nsi mvana kwa mbongo aku.’ Abarayama okedi kuna Kenani yo zingila mu saba.

O Nzambi osadisi Abarayama. Okedi y’ekambi diampwena dia mameme ye bulu yakaka ye ntaudi zayingi. Kansi, Abarayama yo Sara ke bawuta wana ko.

Vava Abarayama kalungisa kimbuta kia mvu 99, Yave wamvovesa vo: ‘Okala ese dia nkangu a zula yayingi.’ Kansi, aweyi divangamena ediadi? Abarayama yo Sara basundidi kimbuta muna wuta o mwana.