NG’OMWENE edi kevanganga Abarayama? Obongele e mbele, se kevonda mwan’andi. Ekuma kekumvondela? Diantete, yambula twabadika mpila Abarayama yo Sara bawutila mwan’au.

Sungamena vo Nzambi wabavan’o nsilu vo mwana bewuta. Kansi, diamonekanga vo ke dilendakana ko kadi Abarayama yo Sara anunu bakala. Kansi, Abarayama wakwikila vo o Nzambi olenda vanga dina dimonekanga vo ke dilendakana ko. Ozevo, adieyi diabwa?

Mvu amvimba wavioka tuka kabavanina nsilu andi o Nzambi. I bosi, vava Abarayama kalungisa 100 mvu, o Sara 90, bawuta mwana wayikilwa vo Isaki. Nzambi walungisa nsilu andi.

Kansi, vava Isaki kanungunuka e ntela, Yave watonta lukwikilu lwa Abarayama. Wambokela: “Abarayama;” yandi vo, “Mono oyu.” Umvovese vo: ‘Bonga mwan’aku, ona wamosi, o Isaki, wenda vana mongo umosi una ikusonga. Umvonda, umfutumwina kuna se lukau.’

E mvovo miami miakendeleka kikilu Abarayama, kadi wazolanga beni mwan’andi. Sungamena mpe vo o Nzambi wasila Abarayama nsilu vo mbongo andi izinga muna nsi a Kenani. Kansi, aweyi divangamena ediadi, avo Isaki ofwidi? Abarayama kabakisa diambu diadi ko, kansi kana una vo iwau, walemvokela Nzambi.

Vava kaluaka vana mongo, Abarayama okangidi Isaki, untensekele van’eziku katunga. Obongele mbele kavonda mwan’andi. Vana vau, mbasi a Nzambi umbokele oku vo: “E Abarayama, e Abarayama: oyandi vo, Mono oyu.”

‘Kusia nleke o koko ko, ngatu kumvanga diambu,’ u kavov’o Nzambi. ‘Owau nzeye wo vo una ye lukwikilu kwa mono, kadi kuvukisi mwan’aku ona wamosi ko.’

Abarayama lukwikilu kikilu kakala lwau muna Nzambi. Wazaya wo vo kuna kwa Yave mawonso melendakana. Wakwikilanga nkutu vo o Yave olenda fula Isaki muna lufwa. Kansi, Nzambi kazola ko vo Abarayama kavonda Isaki. Ikuma, o Nzambi unsongele ememe diavakama muna kanka lukufi yo yandi. Wavovesa Abarayama vo, kafutumuna dio se lukau vana fulu kia mwan’andi.