YOSEFE kalendele diaka kanga ntima ko. Ovovese selo yandi yawonso bavaika kuna mbazi. Vava kasala y’ampangi zandi okazidi ye dilu. Mpangi zandi bamwene wonga kadi ke bazaya ko nkia kuma kedidilanga. I bosi, ovovele vo: ‘Mono i Yosefe: o s’ame, wakinu moyo?’

Ampangi zandi ke bazaya owu wa vutula ko, kadi bamwene o wonga. Kansi, o Yosefe ubavovese vo: “Numfinama, do.” Bamfinamene, ubavovese vo: “Mono i Yosefe wa mbunzi eno, ona nwatek’oku Engipito.”

O Yosefe ubavovesele kuna ngemba vo: ‘Ke nuyimwena makasi ko muna wau nwanteka kwaku; kadi o Nzambi wamfila ku Engipito muna vuluza mioyo. O Faro unkitwidi se nyadi a Engipito yawonso. Owau, nuzabuka, nwatomboka kw’es’ame, nwamvovesa mawonso mama. Numvovesa mpe keza zingila kwaku.’

O Yosefe obimbakene mpangi zandi, ofibidi yau awonso. O Faro vava ka wa vo e mpangi za Yosefe zizidi, umvovese vo: ‘Vovesa mpangi zaku babonga makalu, benda kuna Kenani; batwas’o s’eno, ye nzo zau, bez’oku ngina yabavan’o wete wa Engipito.’

I wau mpe bavanga. Tala Yosefe vava, owananene yo s’andi vava baluaka muna Engipito ye nzo au yawonso.

Nzo ya yakobo yakituka se yampwena. Lusambwadi lwa wantu bakala vava baluaka muna Engipito. Yakobo yo wan’andi y’atekelo andi. Vakala mpe y’akento ye selo yayingi. Bayikilwanga vo Aneyisaele, kadi Nzambi wasoba nkumbu a Yakobo vo Isaele. Aneyisaele bakituka se nkangu amfunu kikilu kwa Nzambi nze una tusinga mona.