NG’OZEYE nkento una va fwaniswa kiaki? Nkumbu andi Rebeka. Oyakala wele wanana yandi nkumbu andi Isaki. O Rebeka okituka se nkaz’andi. Aweyi diavangamena ediadi?

Abarayama w’ese dia Isaki, wazola vo mwan’andi kasompa nkento ambote. Kazola ko vo Isaki kabonga nkento wa mwisi Kenani, kadi nzambi za luvunu basambilanga. O Abarayama wabokela ntaudi andi yo vova vo: ‘Wenda kuna nsi ame, kuna kwa yitu yame kuna Karani wabongela mwan’ame Isaki o nkento.’

Vana vau, o ntaudi a Abarayama wabonga samo kumi yo vanga nkangalu anda. Vava kaluaka vana fulu kiazingilanga yitu ya Abarayama, waningama vana sima kia maza. Se masika, e ntangwa akento bekwiza tekanga maza. O ntaudi a Abarayama wasamba kwa Yave yo vova vo: ‘O ndumba ndiona mvovesa vo umpana maza kavana mpe kwa samo yame; i yandi ndiona osolele mu kala se nkento a ntaudi aku Isaki.’

Ke kolo ko, o Rebeka wizidi teka maza. Vav’o ntaudi kanlomba maza kanua, wamvana. I bosi, wele teka diaka maza mu nuika samo zakala ye vwina. Salu kiayingi kiakala wau vo e samo maza mayingi benwanga.

Vava kamana kubanwika, o ntaudi a Abarayama wanyuvula nkumbu andi ye nkumbu a s’andi. Wayuvula mpe ovo olenda leka kuna nzo au. Wamvutula vo: ‘I mwan’a Betwele kwame ye tuna mpe ye fulu kia leka.’ O ntaudi a Abarayama wabakula vo o Betwele i mwan’a Nako wa mpangi a Abarayama. Ikuma, wafukama yo tonda Yave muna kunlwakisa kwa yitu ya Abarayama.

Muna fuku wauna, o ntaudi a Abarayama wavovesa Betwele yo Labani wa mpangi a Rebeka ekuma kia ngiz’andi. Yau ewole batambulwila vo Rebeka kenda sompwa kwa Isaki. Adieyi kavova Rebeka vava banyuvula? Ovutwidi vo, “nkwenda.” E lumbu kialanda bamente muna samo yo vutuka kuna Kenani.

Muna ntangwa masika balwaka. Rebeka omwene muntu wakangalanga muna mpatu. I Isaki kwandi. Wayangalala mona Rebeka. O Sara wa ngw’andi wafwa vitila mvu ntatu, ediadi diankendelekanga kikilu. Kansi, owau Isaki wayangalala yo toma zola Rebeka wa nkaz’andi.