O MOSE vava kavutuka kuna Engipito, osamunwini Arone wa mpangi andi masivi mawonso kansonga o Nzambi. Vava Mose yo Arone basonga mo kwa Aneyisaele, yau awonso bakwikila vo o Yave wakala yau.

I bosi, o Mose yo Arone bayenda kwa Faro. Bamvovese vo: ‘I wau wuwu kavovele o Yave wa Nzambi a Isaele, sindika nkangu ame badiata lumbu tatu kimana bansambila muna makanga.’ O Faro ovutwidi vo: “Kizeye Yave ko; vana ntandu kisindika Isaele ko.”

O Faro ofungidi makasi kadi Aneyisaele bazolele yambula salu mu kwenda sambila Yave. Ozevo, owokese e salu yau. Aneyisaele batumbidi Mose muna mpasi zazi, ediadi diakendeleka Mose. Kansi, Yave ovovese Mose vo kutokani ko. ‘Nkanikina Faro vo kasindika nkangu ame.’

O Mose yo Arone bele vovana diaka yo Faro. Bavangidi masivi. O Arone otubidi nkau andi vana ntoto, ukitukidi se nioka ampwena. Kansi, akwa ngangu za Faro batubidi mpe konso muntu nkau andi vana ntoto, mikitukidi se nioka. Kansi, tala, nioka a Arone ominini e nioka zau. Kana una vo i wau, o Faro kayambula Aneyisaele ko.

Ozevo, e ntangwa yifwene kwa Yave mu longa Faro elongi diampwena. Ng’ozeye una kavangila wo? Wafila vuku 10 yovo mpasi zayingi muna Engipito.

Kuna nima a konso vuku, o Faro wabokelanga Mose oku vo: ‘Katula e vuku kiaki, i bosi nsindika wan’a Isaele.’ Kansi, vava kiafokokanga e vuku, o Faro wasobanga e ngindu. Kasindikidi nkangu ko. Kuna nima vuku kiekumi o Faro osindikidi Aneyisaele.

Ng’ozeye kimosi kimosi muna vuku 10 yayi? Ziula lukaya lulende twazaya yo.