LOTI ye nzo andi vamosi bazingilanga yo Abarayama kuna nsi a Kenani. Lumbu kimosi, Abarayama wavova kwa Loti vo: ‘E fulu kiaki ke kiafwana ko muna vungula bulu yeto yawonso. Wiyivambul’oku ngina do. Ovo okwenda kuna lunene, omono ngyele kuna lumonso.’

O Loti otadidi nsi yawonso. Omwene fulu kiambote kia ndimb’a Yodani kiazala yo maza ye titi mu dikila e bulu. Ozevo, o Loti wayaluka ye nzo ye bulu yandi. Kuna kwalanda batunga nzo au muna mbanz’a Sodomo.

Esi Sodomo ambi kikilu. Ediadi diakendeleka Loti, kadi muntu ambote kakala. Diakendeleka mpe Nzambi. O Nzambi wafila mbasi zole mu vovesa Loti vo ofwasa Sodomo ye Ngomora mu kuma kia bi wau.

Ambasi bavovesa Loti vo: ‘Telama, bonga nkaz’aku, yo wan’aku wole amakento bena mo nuvaika.’ Loti ye nzo andi bakala ye fuki muna vaika. Ikuma, ambasi babasimba muna moko yo kubavaikisa ku mbazi a mbanza. Mbasi mosi wavova vo: ‘Nutina mu kuma kia mioyo mieno; ke nutadi ku nima ko; nutinina kuna mongo, ke nwafwa.’

Loti yo wan’andi amakento balemvokela mbasi yo sisa Sodomo. Ke baningama ko ngatu tala ku nima. Kansi, nkaz’a Loti wakolamena nsiku. Vava baluaka va la ye Sodomo waningama yo tala ku nima. Wakituka s’etadi dia mungwa.

Tulenda longoka diambu diamfunu mun’elongi diadi. Disongele vo o Nzambi ovuluzanga awana bekunlemvokelanga. Kansi, awana balembi kunlemvokela bevidisa mioyo miau.