TALA e fwaniswa yayi. Konso fwaniswa kisonganga vuku kafila Yave muna Engipito. Muna fwaniswa kiantete, o Arone owende nkau muna Nzadi a Nile. O maza makitukidi se menga. E mbizi muna nzadi zifwidi. E nzadi itele e nsudi.

I bosi, o Yave ovaikisi yiula muna Nzadi a Nile. Yikotele mwawonso. Muna folona, muna kangu ya yokela mbolo, kuna mfulu za wantu. Vava yiula yafwa Angipito bakutikidi yo mafuku mafuku, e nsi itele e nsudi.

I bosi, o Arone owende nkau andi vana ntoto. E mbundukutu a ntoto ikitukidi se mbwengene. E mbwengene i ma kiakete-kete kitatikanga. I vuku kietatu katwika o Nzambi muna nsi a Engipito.

E vuku yayi kwa Angipito kaka yabwilanga, ke kwa Aneyisaele ko. E vuku kia ya kia mbwanzi zanene zazadisa nzo za Angipito awonso. E vuku kietanu mu bulu kiabwila. Ulolo wa ngombe, mameme ye nkombo z’Angipito zafwa.

I bosi, o Mose yo Arone babongele ntoto ampolo batubidi wo mun’ezulu. Utwese mavumbu kwa wantu ye bulu. I vuku kiesambanu.

Edi dialanda, o Mose olambwidi koko kwandi kun’ezulu, o Yave otwikidi miandazi ye mvul’a matadi. Ke vakedi nkutu mvula matadi nze yayi ko muna Engipito.

E vuku kienana kia buka kia makonko. Ke vasidi moneka ulolo wa makonko nze mama ko. Madidi yawonso yasisa mvul’a matadi.

E vuku kievwa kia tombe. Mukedi tombe kin’e bu muna Engipito yawonso mu lumbu tatu. Kansi Aneyisaele bakala yo ntemo kuna bazingilanga.

Kuna mfoko, Nzambi ovovese kwa nkangu andi vo basia menga ma meme yovo ma nkombo vana tungwa ya mielo miau. O mbasi a Nzambi oviokela muna Engipito. Ovo omwene menga vana mwelo, ke vonda muntu ko muna nzo yayina. Kansi muna nzo zawonso ke mwina menga vana mwelo ko, mbasi a Nzambi ovonda mwan’antete a muntu ye bulu. Ekiaki i vuku kiekumu.

I bosi, o Faro oyambwidi Aneyisaele benda kwau. Nkangu a Nzambi bavaikidi muna Engipito mu fuku wauna.