TALA ulolo wa wana bena vava. Awaya i wana 12 a Yakobo. Wawuta mpe wan’ankento. Ng’ozeye nkumbu zau? Yambula twazaya zo.

O Lea owutidi Rubeni, Simone, Levi yo Yuda. O Rakele wakendalala kikilu wau kalembi wuta. Ovene Bila wa ntaudi andi kwa Yakobo. O Bila wawuta wana wole amakala, Dani yo Nafetali. O Lea ovene mpe Zilepa wa ntaudi andi kwa Yakobo. Wawuta wana wole Ngadi yo Asire. O Lea owutidi diaka wana wole amakala, Yisaka yo Zebulune.

I bosi, o Rakele wayiza wuta mwana. Umvene nkumbu a Yosefe. Oku sentu, tulongoka mayingi mu kuma kia Yosefe, kadi wakituka se muntu amfunu kikilu. Awaya i wana 11 kawuta o Yakobo vava kazinganga yo Labani w’ese dia Rakele.

O Yakobo wawuta mpe wan’amakento, kansi, Nkand’a Nzambi nkumbu a mwana mosi kaka keyikanga. Nkumbu andi Dina.

Ntangwa yafwana kwa Yakobo ya sisa Labani yo vutuka kuna Kenani. Wakutika nzo andi yawonso y’ekambi dia mameme ye ngombe wabak’e nzila ya vutuka.

Una ke balweke ko kuna Kenani, o Rakele owutidi mwana akaka w’eyakala. O Rakele wabakama nsongo miampasi. Wafwila vana wutilu. Kansi, o nsedia wasala yo moyo. O Yakobo umvene nkumbu vo Benyamini.

Tufwete sungamena nkumbu za wana 12 a Yakobo, kadi ekanda diawonso dia Isaele mu yau diatuka. Dialudi vo, muna wana 10 a Yakobo ye wana wole a Yosefe i mwatuka nkumbu za makanda 12 ma Isaele. O Isaki wazinga mvu miayingi kunima ngutuk’a wana awaya. Wamona kiese kia kala yo ulolo wa atekelo. Yambula twatala dina diabwa kwa Dina wa ntekelo andi ankento.