YOSEFE mvu 17 kakala vava kanatwa kuna Engipito. Watekwa kwa Potifa. O Potifa selo kia Faro wa ntinu a Ngipito kakala.

O Yosefe watoma sadila Potifa wa mfumu andi. Muna kuma kiaki, vava Yosefe kanungunuka untumbidi se nkengi a nzo andi yawonso. Kansi, ekuma Yosefe kenena muna pelezo? Mu kuma kia nkaz’a Potifa.

O Yosefe se mote kikilu. Nkento a Potifa wazola vo kaleka yandi. Kansi, Yosefe wazaya wo vo ediadi diambi, kavanga wo ko. O nkento a Potifa ofungidi makasi. O nkaz’andi vava kayiza ovunini oku vo: ‘O Yosefe ndioyo undwakidi kaleka yame.’ O Potifa okwikidi muna mvovo miandi, ofungidi Yosefe makasi. Umbakidi, unsidi muna pelezo.

O nkuluntu a pelezo omwene vo Yosefe muntu ambote kwandi. Unsidi se nkengi akangami awonso bakala muna pelezo. I bosi, o Faro ofungidi nembungwa ye nlambi andi makasi. Ubasidi mpe muna pelezo. Muna fuku umosi, yau ewole balotele ndozi, konso muntu ye ndozi andi, kansi ke bazayila zo nsasa ko. Muna menemene o Yosefe ubavovese vo: ‘Nunzayisa e ndozi zeno.’ Muna lusadisu lwa Nzambi o Yosefe ubasasidi e ndozi.

O Yosefe ovovese kwa nembungwa vo: ‘Lumbu tatu kaka yisidi ovaikiswa mu pelezo, yo vutuka se nembungw’a Faro.’ O Yosefe umvovese vo: ‘Vava ovaikiswa unsunzula kwa Faro, umpaikisa mwamu nzo yayi.’ Kansi, kwa nlambi umvovese vo: ‘Lumbu tatu kaka yisidi o Faro okuzeng’o ntu.’

Vava lumbu tatu yavioka, mawonso kavova o Yosefe malungana. O Faro ozengese ntu a nlambi. Vo i nembungwa ovaikisu muna pelezo yo sadila diak’o ntinu. Kansi, kayindula Yosefe ko, umvilakene kwandi. Kansunzwidi ko kwa Faro. O Yosefe okedi kaka muna pelezo.