NKI kibwisanga e yaka yayi ya Yeriko? Ina nze bomba ibwididi mo. Kansi, muna lumbu yayina o wantu ke bakala ye bomba ko; ngatu nkele. Esivi diakaka kavanga Yave. Yambula twazaya una diavangamena.

O Yave wavova kwa Yosua: ‘Ongeye yo makesa maku nuzieta evata lumbu sambanu. Lunata nkele ekangu. Anganga nsambwadi bavit’o ntu yo sika e mpungi zau.

‘Muna lumbu kiansambwadi nuziet’evata nzieta nsambwadi. Nusika mpungi, o nkangu wawonso wakaza; ozevo e yaka kibabama va ntoto.’

O Yosua yo nkangu bavanga una kavova o Yave. Ekolo bazietanga, yau awonso babutamene. Ke vena muntu ko wavovanga. Mazu ma mpungi kaka ye nsindu mia malu miawakananga. Atantu a nkangu a Nzambi muna Yeriko bamwene o wonga. Nga omwene o nsinga wambwaki wakangwa muna zianela? E zianela yayina nga ya nani? Ya Rakabi. Wavanga mana kavoveswa kwa alangi wole. Yitu yandi yawonso yakala muna nzo yo talanga mawonso mavangamanga.

I bosi, muna lumbu kiansambwadi vava bazieta evata nzieta nsambwadi, anganga una basikidi mpungi, makesa bakazidi eyaka yibwidi. O Yosua ovovele vo: ‘Nuvonda wantu awonso yo yoka lekwa yawonso muna mbanza. Kansi, nusisa kaka e palata yo wolo ye nsongo, y’etadi, nunata yo mun’elundilu dia saba kia Yave.’

O Yosua ovovese alangi wole vo: ‘Nukota muna nzo a Rakabi, nwamvaikisa ku mbazi ye yitu yandi.’ O Rakabi ye yitu yandi bavuluzwa nze una bankanikina alangi.