TALA lekwa kezikanga o muntu ndioyo muna saba kiandi! Mvwatu ambote, keswa kia wolo ye palata. Mu mbanza Yeriko kabakila yo. Nga osungamene una ufwete vangwa e lekwa ya Yeriko?

Yifwete fwaswa. Wolo ye palata yafwan’o natwa mun’elundilu dia saba kia Yave. Kansi, wantu awaya bakolamene Nzambi. Bayiyidi ina yivwilu kwa Nzambi. O mwivi ndioyo nkumbu andi Akani, awaya bena yandi esi nzo andi. Yambula twazaya una diavangamena.

Vava Akani kayiya lekwa yayi, o Yosua otumini wantu benda nwana y’esi Ai. Kansi, ke basunda ko. Akaka bavondwa, ndonga muna yau batina. O Yosua okendalele. Obukamene vana ntoto yo samba kwa Yave vo: ‘Ekuma oyambulwidi diambu diadi diatubwila?’

O Yave umvutwidi vo: ‘Telama; Aneyisaele basumukini, babongele e lekwa yafwan’o fwaswa y’eyi yafwan’o natwa muna saba kia Yave. Bayiyidi mvwatu ambote yo sweka wo. Kikunusambula ko yavana nufwasa kio, yo vonda ndiona wayiya e lekwa yayi.’ O Yave ovovese Yosua vo okunsonga muntu ndioyo wambi.

O Yosua olungalakese nkangu. O Yave osongele mwivi ndioyo, Akani. O Akani ovovele vo: ‘Nsumukini. Yamona mvwatu ambote, keswa kia wolo ye palata. Yazola yo, ikuma yabongela yo. Yasweka yo muna ntoto, muna saba kiame.’

Vava batima yo banata yo kwa Yosua, o Yosua ovovese Akani vo: ‘Ekuma ututwasidi e mpasi? O Yave o unu ngeye kemwesa e mpasi.’ O nkangu wawonso utubidi Akani ye nzo andi o matadi yavana bafwa. Ediadi disonganga vo katufwete bonga lekwa yangani ko.

I bosi, Isaele yayenda nwana diaka y’esi Ai. Owau Yave osadisi nkangu andi, basundidi e vita.