MBANZA zayingi muna Kenani zikubamene mu nwanisa Isaele. Babanzanga vo balenda sunda. Kansi, ke wau ko wabanzanga esi Ngibone ana bazinganga lukufi yo yau. Bakwikilanga vo o Yave wasadisanga Aneyisaele, ye ke bazola nwana yo Nzambi ko. Ng’ozeye owu bavanga esi Ngibone?

Bavunini vo kwa nda bazingilanga. Bavwete mataya ye nsampatu zafwa. Banete madila mafwa vana mabuluku mau ye mbolo zamana yuma. Bele kwa Yosua yo vova vo: ‘Ku nsi a vala kikilu tutukidi, kadi tuwidi nsangu za Yave wa Nzambi eno anene y’oma mawonso kavanga muna Engipito. Mu kuma kiaki, mfumu zeto batuvovese vo twanata nkuta twiza vovana yaku vo: Oyeto tu ntaudi zeno, owau nutusila nsilu vo ke nukutunwanisa ko. Nutala e mvwatu mieto miavwa fwa mu kuma kia la kwa nzila ye mbolo zeto zamana yuma.’

O Yosua ye afidi akaka bakwikidi esi Ngibone. Babasididi nsilu vo ke bekubanwanisa ko. Kansi, vava vavioka lumbu, bazayidi wo vo esi Ngibone mfinangani zau kwandi.

O Yosua ubavovese vo ‘Mu nkia kuma nwatuvunginikini vo ku nsi a vala nwatuka?’

Angibone bavutwidi vo: ‘Twavanga wo ekuma kadi twawidi wo vo o Yave wa Nzambi eno wakanikina kunuvana nsi yawonso ya Kenani. I diau didi twamwenene kikilu o wonga vo vonda nukutuvonda.’ Kansi, Aneyisaele balungisa nsilu au, ke bavonda esi Ngibone ko. Babakitwidi se ntaudi zau.

O ntinu a Yerusaleme ofungidi makasi wau vo esi Ngibone bavangidi e ngemba yo Isaele. Ovovese kwa ntinu nyá miakaka vo: ‘Nwiza nwansadisa twanwanisa Ngibone.’ I wau bavanga e ntinu ntanu miami. Esi Ngibone diangangu kikilu bavanga muna vanga e ngemba yo Isaele. Ekiaki i kuma e ntinu miami mizidi kubanwanisa, nze una tumona.