VAVA Aneyisaele bayisianga mu mpasi basambanga kwa Yave. O Yave wawanga sambu kiau yo kubavana afidi ambote mu kubasadisa. Muna Nkand’a Nzambi beyikilwanga vo afundisi. O Yosua i mfundisi antete. Aya banlandila Oteniele, Eude yo Sanga. Kansi, muna aya basadisa nkangu a Isaele o nwole akento, e nkumbu zau Debora yo Yaele.

Debora ngunza ankento kakala. O Yave wanzayisanga mambu mevangama, oyandi wasamunanga mo kwa nkangu. Mfundisi mpe kakala. Debora kunansi eya kafonganga vana kundubulu. O nkangu wayizanga kwa yandi mu lomba lusadisu.

Muna kolo kiakina Yabini wakala ntinu a Kenani. Nkama vwa za makalu ma vita kakala mau. Makesa mandi mangolo makala, ikuma vo ndonga muna Aneyisaele bakitulwa se ntaudi za Yabini. O mfumu a makesa ma Yabini i Sisera.

Lumbu kimosi, o Debora wabokelesa Baraki wa mfundisi umvovese vo: ‘O Yave ovovele vo: Nata wantu 10.000 kuna Mongo a Tabo, i kuna ngyekolwela Sisera vana koko kwaku. Okunsunda yo makesa mandi.’

Baraki ovovese Debora vo: “Ovo okwenda yame, nkwenda.” O Debora wele yo Baraki, kansi umvovese vo: ‘Ke ngeye ko otambula o zitu wa nsundidi, kadi o Yave oteka Sisera vana koko kwa nkento.’ I diau mpe diavangama.

O Baraki okulumukini kuna Mongo a Tabo mu wanana yo makesa ma Sisera. Vana vau o Yave otwese kizalu, ndonga muna makesa m’atantu banwini nkaki. Kansi, o Sisera okulumukini mun’ekalu diandi dia vita, otinini.

I bosi, o Sisera watinina kuna saba kia Yaele. Unkotese muna saba kiandi, umvene kimvumina kanua. Kimvene o tulu, olele. O Yaele obongele elunzi dia saba owende dio muna ntu a Sisera, ofwidi. Vava Baraki kalwaka unsongele e vimbu dia Sisera. Ng’omwene una mvovo mia Debora mialunganena?

Oku kwalanda, o Yabini wa ntinu mpe wavondwa. Aneyisaele bavuvamene mu fikolo.