LUSANSU LWA 40
Mose Owende Etadi
VAVIOKELE mvu miayingi—10, 20, 30, ye 39 ma mvu. Aneyisaele bakinu muna makanga. Kansi, Yave wabalunga-lunga mu mvu miami miawonso. Wabadikila ye mana. Muna mwini wabafidila mun’elunzi di’etuti, muna fuku mun’elunzi dia tiya. Muna mvu miami miawonso e mvwatu miau ke miafwa ko ngatu vimba malu mau.
Eyayi i ngonde antete vava balungisa 40 ma mvu tuka bavaikila muna Engipito. Aneyisaele balueke muna Kadese. Ekiaki, i fulu bateka kala vava alangi 12 bayenda langa nsi a Kenani vioka 40 ma mvu. O Mireyame wa nsanga Mose ofwidi kuna Kadese. Zunga kiampasi kiakala.
Ke vakala maza ko. O nkangu uyidimini Mose vo: ‘Kele vo twafwa kweto nga diambote. Mu nkia kuma watuvaikisila muna Engipito, nwatutwas’omu fulu kiaki kiambi? Oku ke kuna mbongo ko, yovo nsanda, yovo nsinga mia vinyo, yovo nganata; o maza mpe nkatu twanua.’
Vava Mose yo Arone bayenda samba muna saba, o Yave ovovese Mose vo: ‘Lunganisa nkangu vamosi. Vovesa awonso vo etadi vana bena divaikisa ulolo wa maza kwa wantu ye kwa bulu.’
I bosi, o Mose olungalakese nkangu, ovovele vo: ‘Se nuwe yeno nulembi bunda Nzambi e vuvu; nga Arone yo mono twanuvaikisil’o maza mun’etadi diadi e?’ I bosi, Mose owende o nkau mun’etadi, ngwanda zole: o maza mapongokele, nkangu banwini ye twelezi yau.
O Yave ofungidi Mose ye Arone makasi. Ng’ozeye ekuma? Ekuma kadi, o Mose yo Arone bavovele vo yau bavaikisa maza mun’etadi. Kansi, Yave wavaikisa mo. Wau vo o Mose yo Arone ke bavova ludi ko muna diambu diadi o Yave ubatumbidi. Ubavovese vo: ‘Ke nukotesa nkangu ame muna Kenani ko.’
Ke kolo ko, Aneyisaele basisidi Kadese. Balweke muna Mongo a Oro. I vava kafwila Arone vana ntandu a mongo. Wafwa ye kimbuta kia mvu 123. Aneyisaele bakendalele kikilu, bandididi mu lumbu 30. Elaza wa mwan’andi okitukidi se ngang’ambuta wa zula kia Isaele.