TALA! Adieyi bevanganga o nkangu wau? Mu sambila bena mwan’a ngombe. Ekuma bavangidi e diambu diadi?

O Mose wau kanangini kuna mongo, o nkangu uvovele vo: ‘O Mose ndioyu, ketuzeye edi dimbwidìdi ko. Yambula twavanga nzambi katukatula va fulu kiaki.’

‘Ke diambu ko,’ ukavova Arone wa mpangi a Mose. ‘Nubonga nlunga mieno miawonso mia wolo, nuntwasila mio. Vava bantwasila mio, o Arone oyandwidi mio ovangidi mwan’a ngombe. Nkangu uvovele vo: ‘Eyayi i nzambi eto, ina yatutombola tuka muna Engipito.’ Aneyisaele badidi yo nua. Basambidi mwan’a ngombe awolo.

O Yave vava kamwene wo, ofungidi makasi. Ovovese Mose vo: ‘Wenda, nda kulumuka mu nzaki. O nkangu usumukini. Bavilakene nsiku miame. Mu sambila bena mwan’a ngombe awolo.

O Mose ozabukidi kulumuka muna mongo. Adieyi kamona vava kafinama? O nkangu uyimbilanga yo kina vana vena mwan’a ngombe. O Mose ofungidi kikilu makasi. Otubidi e babu yole ya matadi yasonama e nsiku vana ntoto, yiwudikidi. Obongele mwan’angombe unyokele vana tiya. Ozelokele.

O nkangu diambi kikilu bavanga. Ikuma, Mose ovovese akaka wantu vo babonga nsosolo miau. ‘Luvonda konso muntu osambidi mwan’a ngombe awolo.’ Bavondele tezo kia 3.000 muna nkangu. Ediadi disonganga vo Yave kaka tufwete sambila, ke nzambi zakaka ko zaluvunu.