TALA mvuma ye bundu yabwaka imenene muna nkau wau. I nkau a Arone. Mu fuku umosi yamena. Yambula twazaya ekuma.

Aneyisaele bakedi muna makanga mu fikolo. Akaka ke bazolele ko vo Mose kakala se mfidi au ngatu Arone se ngang’ambuta. Akaka muna yau i Kora, Datani, Abirami ye 250 z’akuluntu a nkangu. Yau awonso bezidi vova kwa Mose vo: ‘Nkia kuma nukuyikundidikila vana vena nkutakani a Yave?’

O Mose ovovese Kora y’akw’andi vo: ‘O mbazi mene nubonga yokelwa, nusia yo ndumbu. Nwiza muna saba kia Yave. Twazaya kana nani kesola o Yave.’

Lumbu kialanda o Kora ye 250 y’akw’andi bezidi muna saba. Ndonga yakaka babalende. O Yave ofungidi makasi. O Mose ovovese nkangu vo: “Nukatuka muna saba ya yimpumbulu yayi, ke nuviakana ma bena kiau ko.” Nkangu Bakatukidi muna saba kia Kora yo Datani yo Abirami.

O Mose ovovele vo: ‘Muna diadi i nuzayila kana nani kasolele o Yave. O ntoto uziuka yo mina yimpumbulu yayi.’

Una kamana vova mambu mama, vana vau o ntoto uziukidi. Uminini saba kia Kora, Datani, Abirami ye yawonso bakala yau, y’ana babalandanga. O ntoto ubafukidi. Vava nkangu wa wa e kazu ki’awana bakota mu nsi a ntoto, bavovele vo: ‘Tutina, nkwa kala vo o ntoto ukutumìna.’

O Kora ye 250 z’alandi andi bakinu muna saba. O Yave otwikidi o tiya tuyokele yau awonso. I bosi, o Yave ovovese Elaza wa mwana Arone vo kabonga yokelwa yansongo ina basunzwidi awaya bafwidi, kazezola yo, kakitula yo se fukwa ki’eziku. E fukwa kiaki, kikedi se luyindwilu kwa wan’a Isaele vo Arone kaka yo wan’andi bekala s’anganga kwa Yave.

Kansi, o Yave wazola kiesesa kwa nkangu vo Arone kasola ye wan’andi mu salu kia kinganga. Ikuma ovovese Mose vo: ‘Bonga nkau mia akuluntu a konso kanda dia Isaele. Muna kanda dia Levi nkau a Arone. Sia nkau miawonso muna saba, vana ntwala a nkele ekangu. Nkau wa ndiona nsolele se nganga uyima mvuma.’

Oku menemene, vava Mose kayenda mio tala o nkau a Arone umenene e mvuma ye bundu yabwaka. Ng’omwene ekuma Yave kamenesena e mvuma muna nkau a Arone?