TALA! Aneyisaele mu sauka bena o Nkoko a Yodani. O maza akweyi mele, wau vo nsungi a mvula yakala? Vava ke basaukidi ko o nkoko wazala wakala. Kansi owau o maza mayumini. Aneyisaele mu sauka bena vana ntoto ayuma nze una bavanga muna Mbu Ambwaki. Akweyi kwayenda maza mama mawonso? Yambula twatala.

Vava yafwana e ntangwa kwa Aneyisaele mu sauka Nkoko a Yodani o Yave watuma Yosua kavovesa nkangu vo: ‘Anganga banata nkele ekangu, yo vit’o ntu. Vava anganga bekotesa tambi yau muna maza ma Yodani, o maza meningama.’

Ozevo, anganga bazangwidi nkele ekangu yo nata yo kuna ntwala a nkangu. Vava baluaka muna Yodani anganga bakotele muna maza. Maza mu ngolo makukwilanga ye mansini makala. Kansi, vava e tambi yau yakota muna maza, o maza mayambwidi o kukula. Diakala se diambu diasivi. O Yave wakanga e nto za maza. Vana vau maza mayumini muna nkoko.

Anganga, anati a nkele ekangu bakotele muna kati kwa nkoko ayuma. Nga ubamwene muna fwaniswa kiaki? Ekolo batelamene, Aneyisaele awonso basaukidi Nkoko a Yodani vana ntoto ayuma.

Vava bamana sauka o Yave ovovese Yosua kasola makesa 12 kabavovesa vo: ‘Nwenda muna nkoko vana fulu kianingamena anganga ye nkele ekangu, nubonga matadi 12 nukundika mo vana nuleka. Kuna sentu vava o wan’eno bekunuyuvula e nsas’a matadi mama nubavutula vo: O maza mayambula kukula vava nkele ekangu dia Yave yasauka Yodani. Matadi mama i luyindwilu lw’esivi diadi.’ O Yosua mpe okundikidi matadi 12 vana vatelama anganga muna nkoko.

I bosi, o Yosua wavova kwa anganga anati a nkele ekangu vo: ‘Nutomboka muna Yodani.’ Una batomboka vana vau o maza mavutukidi o kukula.