MUNA ngonde yezole tuka bavaikila muna Engipito, Aneyisaele balueke muna Mongo a Sinai, uyikilwanga mpe vo Korebe. I fulu kina Yave kavovesela Mose muna nti walemanga. Nkangu ulweke yo nangina ko mu fikolo.

O Mose osisidi nkangu vana ndimba, otombokele kuna mongo. Vava kalwaka vana ntandu a mongo, o Yave ovovese Mose vo: Edi nzolele kwa Aneyisaele vo bandemvokela yo kituka se nkangu Ame. Vav’o Mose kakulumuka tuka kuna mongo, ovovele mambu kankanikina Yave kwa Aneyisaele. O nkangu uvutwidi vo belemvokela Yave, kadi bazolele kala se nkangu andi.

I bosi, o Yave ovangidi diambu diesivi. Ofutumwini mwisi vana ntandu a mongo, vakedi miandazi. Ovovele mpe kwa nkangu: “Mono i Yave wa Nzambi aku, oyu wavaikìsi muna Engipito.” Ubakanikini vo: ‘Ke nusambila Nzambi zakaka ko, mono kaka.’

Nzambi wavana nkanikinu evwa miakaka yovo nsiku kwa Aneyisaele. Nkangu umwene kikilu o wonga. Bavovese Mose vo: “Ngeye ovova yeto, kansi kuyambula Nzambi kavova yeto ko, tunkwa fwa.”

I bosi, o Yave ovovese Mose vo: ‘Wiza tombok’oku ngina ku mongo, ikuvana babu yole y’etadi, ina yo nsiku mina nsonekene. Nzolele vo nkangu walemvokela mio.’ O Mose otombokele diaka kuna mongo. Okedi ko mini 40 yo mafuku makumaya.

O Yave nsiku miayingi kakala miau mu vana kwa nkangu andi. O Mose wasoneka mio. O Nzambi wavana mpe babu yole y’etadi kwa Mose. Nzambi yandi kibeni wasoneka nsiku 10 mina kavova kwa nkangu awonso. Miyikwanga vo Nkanikinu Kumi.

E Nkanikinu Kumi, nsiku miamfunu kikilu, y’emi miakaka mpe kavan’o Nzambi kwa Aneyisaele. Umosi muna nsiku i wau: “Zola Yave wa Nzambi aku yamuna nsi a ntim’aku yawonso, yo muna fulumwinu kiaku kiawonso, yo muna nyindu aku wawonso.” Wakaka i wau: “Zola nkw’aku, konso un’okuzolela.” O Yesu Kristu wa Mwan’a Nzambi wavovova vo emiami i nkanikinu miole mianene kavan’o Yave kwa nkangu andi Isaele. Kuna ntwala, tulongoka mayingi mu kuma kia Mwan’a Nzambi ye malongi mandi.