NG’OZEYE e nzo yayi? I saba kia sambila Yave. Nkangu watunga kio vioka mvu mosi tuka bavaikila kuna Engipito. Ng’ozeye nani watungisa kio?

Yave. Vava Mose kakala kuna Mongo a Sinai Yave wamvovesa una kifwete tungilwa. Wamvovesa vo kiatungwa mu mpila kilenda yalulwilwa mu nzaki. E yikwa yandi ilenda natwa ku fulu yakaka yo yikakeswa diaka. Ozevo, vava Aneyisaele bayalukanga tuka fulu eki ye kiakaka muna makanga banatanga e saba kiau.

Ovo otadidi esuku diakete dina kuna nsuk’a saba omona e nkela. Iyikilwanga vo nkele ekangu. Mbasi zole yovo akelubi zawolo zina mo, mosi vana konso konko. O Nzambi osonekene diaka Nkanikinu Kumi muna babu yole ya matadi, kadi yina yantete yawulwa kwa Mose. E babu yayi muna kati kwa nkele ekangu yalundilwanga. Muna mpe ye kinzu kiawolo kiakala mana. Nga osungamene e mana?

O Yave wasola Arone wa mpangi a Mose se ngang’ambuta. Okedi se mfidi a nkangu muna nsambila a Yave. O wan’andi mpe nganga bakala.

Owau, tala muna suku diampwena dia saba. Disundidi esuku dina kuna nsuka o vonga. Ng’omwene e nkela ina yakete ifutumukang’o mwisi? Ediadi i ziku dina anganga bayokelanga ma yansunga iyikilwanga vo ndumbu. Vena mpe ye mini nsambwadi. E ma kietatu kina muna suku diadi i meza. Mbolo 12 zina vana ntandu a meza.

Vana yanzala kia saba vena ye sukulwilwa kiampwena kiazala yo maza. Muna bayisukulwilanga anganga. Vena mpe y’eziku diampwena. Vana bakelelanga yimenga ya bulu kwa Yave. E saba va kati kiasiwa, Aneyisaele bazunga kio.