TALA e bundu banete wantu awaya. Tala o vonga kwa ntayi kimosi kia uva, kineto kwa wantu wole muna nti. Batwese mpe nsanda ye bundu yakaka. E bundu yayi yambote akweyi itukidi? Kuna nsi a Kenani. Sungamena vo e Kenani i nsi bazingidinge Abarayama, Isaki yo Yakobo. Kansi, mu kuma kia mvengele o Yakobo ye nzo andi bayaluka kuna Engipito. Owau, vioka mvu 216, o Mose ofilanga Aneyisaele mu vutuka kuna Kenani. Balueke va fulu kiayikilwanga vo Kadese.

Wantu ambi bazingilanga muna nsi a Kenani. Ikuma, o Mose otumini alangi 12 ubavovese vo: ‘Numona lutangu lwa nkangu uzingilanga mo, kana bakumama yovo batovoka, yo konso owu una ntoto, kana wa mbongo. Nutwasa bundu.’

Vava alangi bavutuka kuna Kadese bavovese Mose vo: ‘Kieleka, e nsi yambote.’ Basongele e bundu banata kwa Mose mu kwikanisa mvovo miau. Kansi alangi 10 bavova vo: ‘Nkangu uzingilanga mo wanene ye ngolo. Vondwa tuvondwa avo tutezele tambula nsi.’

Aneyisaele bamwene o wonga vava bawidi mvovo miami. “Ekwe! kele vo twafwila kweto muna Engipito! yovo twafwila muna makanga mama!” Ubavova. ‘Tufwila muna nsosolo. Akazi eto ye yingyana-ngyana bekala s’esanzu. Mbula twasola mfidi ampa katuvutula kuna Engipito.’

Kansi alangi wole Yosua yo Kalebe babunda Yave e vuvu, badingidikidi o nkangu. Bavovele vo: ‘Ke numoni wonga ko. O Yave wina yeto. Ke dikala diampasi ko muna baka nsi.’ Kansi, o nkangu ke babawila ko. Bavavidi nkutu vonda Yosua yo Kalebe.

O Yave ofungidi makasi. Ovovese Mose vo: ‘Ke vena mosi ko mun’akwa mvu 20 yo sunda okota muna nsi a Kenani. Bamwene masivi yavanga muna Engipito ye mu makanga, kansi, ke bambundidi e vuvu ko. Muna kuma kiaki, nuvumvula muna makanga mvu 40 yavana numana fwa. Yosua kaka yo Kalebe bekota muna nsi a Kenani.’