VAVA Davidi kayantika yala muna Yerusaleme o Yave wansundisa vita zayingi vana vena atantu andi. O Yave wasia nsilu vo ovana nsi a Kenani kwa Aneyisaele. Owau, muna lusadisu lwa Yave batambula nsi yawonso kabasila nsilu.

O Davidi ntinu ambote. Wazolanga Yave. E diambu diantete kavanga vava katambula Yerusaleme i twasa e nkele ekangu dia Yave. Wazola tunga tempelo kimana e nkele ekangu yakala mo.

Vava Davidi kanuna, wavanga diambu diambi. Wazaya wo vo diambi muna bonga ma kiangani. Kansi, fuku dimosi vava kakala vana nludi a nzo andi, omwene mote a nkento. Nkumbu andi Bate-seba. O nkaz’andi ekesa kakala, nkumbu andi Ureya.

O Davidi unzolele kikilu, untumisi kuna nzo andi. O nkaz’andi kena vo ko, kuna vita kakala. O Davidi olele yandi. Vava kazaya wo vo o nkento oyimiti o Davidi otokanene kikilu. Otumini Yoabe wa mfumu a makesa vo kasia Ureya kuna ntu a vita kuna kulutidi e mpasi, kavondwa. Vava Ureya kafwa o Davidi obongele Bate-seba se nkaz’andi.

O Yave ofungidi kikilu Davidi o makasi. Otumini Natani wa selo kiandi kenda zayisa Davidi masumu mandi. Nga omwene Natani ovovanga yo Davidi? O Davidi okendalele kikilu mun’evangu diandi. Muna kuma kiaki, o Yave kamvondele ko. Kansi, wamvovesa vo: ‘Wau vo ovangidi e mbi yayi yawonso, mpasi zayingi zibwa muna nzo aku.’ Elo, mpasi kikilu zambwila.

Entete, mwan’a Bate-seba wafwa. I bosi, Amenone wa mwan’antete a Davidi olele yo Tama wa nsang’andi. Abesalome wa mwan’a Davidi ofungidi makasi, ovondele Amenone. Oku kwalanda, o Abesalome obendomwene nkangu ayingi kun’esambu diandi, uyikitwidi se ntinu. Kuna mfoko, Davidi wasunda e vita, o Abesalome wavondwa. Elo, mpasi zayingi zabwila Davidi.

I bosi, Bate-seba owutidi mwana umvene nkumbu vo Solomo. O Davidi se nunu kwandi, oyelele. Adoniya wa mwan’andi uyikitwidi se ntinu. Muna kuma kiaki o Davidi otumini Sadoke wa nganga kayitila mazi vana ntu a Solomo mu songa vo yandi okala se ntinu. O Davidi ofwidi ye kimbuta kia mvu 70. Mvu 40 kayala. O Solomo okitukidi se ntinu a Isaele.