AFELESETIA bezidi nwanisa diaka Isaele. Mpangi tatu za Davidi se makesa ma Saulu. Lumbu kimosi o Yisai ovovese Davidi vo: ‘Bonga masa mayokwa, ye mbolo kumi zazi, nata zo kwa mpangi zaku. Tala owu bena ampangi zaku.’

Vava Davidi kaluaka kuna kwakala makesa, olundumukini kuna fulu kia nwanina, wele vavi ampangi zandi. Vavaikidi Ngoleyate wa Mfelesetia mu sakanena Aneyisaele. Wavanganga wo konso mene ye masika, mu lumbu 40. Ovovele vo: ‘Nusola muntu kanwana yame. Avo osundidi yo kumponda tukituka se abundu eno. Kansi, ovo nsundidi yo kumvonda nukituka se abundu eto. Ke nukabuka sola muntu ko kandwanisa.’

O Davidi oyuvwidi makesa vo: ‘Aweyi kevangwa o muntu ona ovonda Mfelesetia ndioyu, kakatula lusembo muna Isaele?’

Bamvutwidi vo: ‘O ntinu vwamisa kekumvwamisa, yo kumvana mwan’andi ankento kakala se nkaz’andi.’

Kansi, Aneyisaele bamwenene Ngoleyate o wonga kadi ekesa dia yakala kakala. Meta 3 kakala mu la, wakala yo nati a nwaninwa yandi.

Makesa makaka bele samunwina Saulu vo o Davidi ozolele nwana yo Ngoleyate. O Saulu ovovese Davidi vo: “Kulendi nwanisa Mfelesetia ndioyu ko; kadi u nleke kwaku, oyandi ekesa tuka kileke kiandi.” Davidi umvutwidi vo: ‘Yavonda nkosi ye use wavava dia ememe di’es’ame. O Mfelesetia ndioyu okala nze yau. O Yave okunsadisa.’ Saulu umvovese vo: “Wenda, o Yave okala yaku.”

O Davidi okulumukini kuna nkoko, obongele matadi matanu malengolengo okobwele mo muna nkutu andi. Obongele nsing’andi wa tubila matadi ofinamene Mfelesetia. Vava Ngoleyate kamona Davidi, umvezele. Wabanza vo vana vau kekumvonda.

Ngoleyate umvovese vo: ‘Wiza kwa mono, yavana nitu aku kwa nuni z’ezulu, yo kwa bulu ya futa.’ O Davidi umvovese vo: ‘Ongeye okungizila yo nsosolo y’edionga y’eswanga: kansi omono ngizidi kwa ngeye muna nkumbu a Yave. O unu o Yave okuyekola vana koko kwame: yavonda.’

O Davidi ozabukidi, olundumukini kawanana yo Ngoleyate. Obongele etadi muna nkutu andi, okangidi dio muna nsing’andi, otubidi dio ye ngolo zawonso. Etadi diele vana nkuta lose lwa Ngoleyate, obuidi, ofwidi. Afelesetia, vava bamwene vo ekesa diau difwidi, batinini. Aneyisaele babalende yo sunda e vita.