NGA ozeye ekuma muntu ndioyo ketiazwinanga mvwatu andi? Yave untumini mu vanga wo. Ondioyo Akiya wa ngunz’a Nzambi. O ngunza nani? I muntu ona Nzambi kezayisanga mambu una kemavangamene ko.

Ovava Akiya mu vova kena yo Yerobame. O Yerobame i muntu kasia o Solomo e kinkengi kia salu kia nzo. Vava Akiya kawanana yandi muna nzila, ovangidi diambu dianzenza. Ovudidi mvwatu ampa una kavwata, otiazwini wo mu tini 12. Ovovese Yerobame vo: ‘Bonga tini 10.’ Nga ozeye ekuma Akiya kavanina tini 10 kwa Yerobame?

Akiya umvovese vo o Yave okatula kintinu vana koko kwa Solomo. Okuvana makanda 10. Ediadi diasonganga vo Rekabame wa mwana Solomo makanda mole kaka keyala.

Vava Solomo kawa mana Akiya kavovesa Yerobame ofungidi kikilu makasi. Ovavidi vonda Yerobame. Kansi o Yerobame otinini kuna Engipito. Ke kolo ko, Solomo ofwidi. Mvu 40 kayala, o Rekabame wa mwan’andi okitukidi se ntinu. Vava Yerobame kawa vo Solomo ofwidi ovutukidi muna Isaele.

O Rekabame ke ntinu ambote ko. Olutidi bangika nkangu ke mu Solomo w’es’andi ko. O Yerobame ye mbuta zakaka bezidi lomba kwa Rekabame wa ntinu vo kavevola mazitu makomenwa nkangu. Kansi, Rekabame kabawila ko. Owokese nkutu kubabangika. Ozevo, nkangu utumbidi Yerobame se ntinu a makanda 10, kansi makanda mole, Benyamini yo Yuda mayalwa kwa Rekabame.

Yerobame kazola ko vo nkangu benda sambila Yave muna tempelo kuna Yerusaleme. I diau vo, ovangisi wan’a ngombe wole awolo yo fila nkangu wa kintinu kia makanda 10 basambila yo. Ke kolo ko e nsi izele ye nsoki yo umpumbulu.

Kintinu kia makanda mole mu mpasi mpe kiakala. O Rekabame kalungisa nkutu mvu ntanu ko muna luyalu lwandi, o ntinu a Engipito wayiza nwanisa Yerusaleme. Onete salanganu yayingi ya tempelo a Yave kuna Engipito. Ozevo, e tempelo kolo kiandwelo kaka yakala nze una yatungilwa.