AVO ofwidi aweyi kalenda mona ngudi aku kele vo ovutukidi o zinga? Kiese kiayingi kemona. Kansi, muntu ofwidi nga kalenda zinga diaka? Nga diavangama kala e diambu diadi?

Tala muntu ndioyo yo nkento ye kindende. Yandi i Eleya wa ngunza. O nkento, i nsona wazingilanga muna mbanz’a Sarefate, e kindende i mwan’andi. Lumbu kimosi e kindende oyelele, o mayela masakidi i bosi ofwidi. O Eleya ovovese nkento vo: “Umpana mwan’aku.”

Eleya obongele mvumbi unete mun’esuku diandi diantandu, unlavidikidi vana mfulu. Osambidi vo: ‘E Yave, yambula mwana kavutuka o zinga.’ O mwana oyantikidi fulumuna. O Eleya obongele mwana okulumukini yandi ovovese kwa nkento vo: “Tala mwan’aku un’o moyo.” O ngudi andi omwene kikilu e kiese.

Ngunza akaka a Yave wayikilwanga vo Elesa. Wakala se nsadisi a Eleya. Kansi, oku sentu o Yave wansadila mpe mu vanga masivi. Lumbu kimosi, o Elesa wele kuna mbanza Suneme. Kuna kwakala nkento watoma kuntambulanga. I bosi, nkento ndioyo wawuta mwan’eyakala.

O mwana vava kakula, ovaikidi muna mene wele kuna kwasadilanga o s’andi. Ke kolo ko otatidi vo: ‘E ntu ame, e ntu ame.’ Oneto kuna nzo, ofwidi. O ngw’andi okendalele kikilu. Vana vau wele avavi Elesa.

O Elesa vava kaluaka okotele ye mvumbi muna suku. Osambidi kwa Yave, olavalele van’evimbu dia mwana. Ke kolo ko e nitu a mwana iyandukidi. O mwana otele nkesia e nta nsambwadi. Nkia mpila kiese kwa ngudi vava kamona vo mwan’andi una moyo?

Ndonga ya wantu befwanga. Ediadi dikendelekanga yitu ye akundi au. Ke tuna ye wisa kia vutula moyo amafwa ko. Kansi, Yave una ye wisa kiaki. Tusinga longoka una Yave kevutulwisila mazunda ma wantu o moyo.