TALA nleke ndioyo osevwanga. Nga unzeye? I Yeremiya wa ngunz’a Yave.

Yave wavovesa Yeremiya kakala se ngunz’andi vava Yosiya wa ntinu kayantika fwasa e teke muna nsi. O Yeremiya uyimwene vo nleke kwandi muna kala se ngunza. Kansi, Yave umvovese vo okunsadisa.

O Yeremiya ovovese Aneyisaele bayambula vanga e mbi. ‘E nzambi besambilanga azula za luvunu,’ u kabavovesa. Kansi, ndonga muna Aneyisaele basolele sambila teke ke mu Yave wa Nzambi ko. Vava Yeremiya kavovesa nkangu vo o Nzambi okubatumba mu kuma kia bi wau, seva kwandi bansevanga.

Oku kwalanda o Yosiya ofwidi. Vioka ngonde tatu, Yoyakime wa mwan’andi umvingidi e kintinu. Yeremiya wakwamanana zayisa kwa nkangu vo: ‘E Yerusaleme ifwaswa avo ke nuvilukidi muna nzila zeno zambi ko.’ Anganga bakangidi Yeremiya yo vova vo: ‘Fwa kaka ofwa, kadi osakwidi mambu mama.’ I bosi, bavovese kwa akuluntu a Isaele vo: ‘O Yeremiya kafwete fwa kadi mbanz’eto kavovel’e mbi.’

Aweyi kavanga o Yeremiya? Kamona wonga ko. Ubavovese vo: ‘O Yave untumini kwa yeno yanuvovesa mambu mama mawonso. Avo ke nusoba mavangu meno mambi ko, o Yave ofwasa Yerusaleme. Kansi, nuzaya e ludi vo, ovo nukumponda, muntu wakondwa kuma nuvonda.’

Akuluntu banyambwidi, kansi Aneyisaele ke bayambula nzila zau zambi ko. I bosi, Nebukandesa wa ntinu a Babele wizidi nwanisa Yerusaleme. Okitwidi Aneyisaele se ntaudi zandi. Onete ulolo wa mazunda muna yau kuna Babele. Se badiki, aweyi olenda mona kele vo nzenza uyalwidi mu nsi aku yo kunata ku nsi ina olembele zaya?