NGA ozeye ekuma muntu ndioyo kesambilanga kwa Yave? Ekuma kayalumwini nkanda miami vana ndambu eziku dia Yave? Kizekeya wa ntinu a makanda mole ma sude, ma Isaele. Mu mpasi zayingi kena. Ekuma?

Makesa m’Asuri bafwasidi makanda 10 ma node. Yave wayambula vo ediadi diababwila kadi nkangu mambi bavanganga. Owau, makesa ma Asuri mezidi nwanisa kintinu kia makanda mole.

O ntinu a Asuri osonekene Kizekeya wa ntinu e nkanda. I miau kayalumwini Kizekeya vana vena Nzambi. Batiangwini Yave yo vova kwa Kizekeya vo kayiyekola. Muna kuma kiaki o Kizekeya osambidi vo: ‘E Yave utuvuluza vana koko kwa ntinu a Asuri. E zula yawonso ya nza yazaya wo vo, ngeye kaka u Nzambi.’ O Yave nga wawila Kizekeya?

Kizekeya ntinu ambote kakala. Kakala nze ntinu miambi ko miayalanga makanda 10 ma Isaele, ngatu kala nze s’andi Akazi wa ntinu ambi. O Kizekeya walemvokelanga nsiku miawonso mia Yave. Ozevo, vava kamana samba, o Yesaya wa ngunza ozayisi diambu dia Yave kwa Kizekeya, oku vo: ‘Ntinu a Asuri, keluaka mu mbanza Yerusaleme ko. Ke vena kesa diandi ko ofinama yo, ngatu nonga e mbanza.’

Tala e fwaniswa kiaki. Nga ozeye makesa mama mawonso mafwa? Makesa ma Asuri. O Yave otwikidi mbasi andi, muna fuku wauna ovondele makesa 185.000 ma Asuri. O ntinu a Asuri ovutukidi kuna nzo andi.

Kintinu kia makanda mole kiavuluzwa. O nkangu ukedi ye luvuvamu mu fikolo. Kansi, vava Kizekeya kafwa, Manase wa mwan’andi umvingidi e kintinu. Manase ye Amone wa mwan’andi wamvingila e kintinu, ntinu miambi kikilu bakala. E nsi izele diaka yo nsoki ye umpumbulu. Amone wa ntinu wavondwa kwa ntaudi zandi. O Yosiya wa mwan’andi oyadidi se ntinu a kintinu kia makanda mole.