LUSANSU LWA 56
Saulu—Ntinu Antete a Isaele
TALA Samuele oyitilanga mazi vana ntu a muntu ndioyo. I wau wavangwanga muna songa vo o muntu osolelo mu kala se ntinu. O Yave wavovesa Samuele kayitila mazi vana ntu a Saulu. Mazi mantalu, mansunga makala.
O Saulu kayindulanga ko vo wafwana kala se ntinu. ‘I Mbenyamini kwame, ekanda dina disakalele muna makanda ma Isaele,’ u kavova kwa Samuele. ‘Adieyi okumpovesela vo nkala se ntinu?’ O Yave wazolanga Saulu kadi kayitundidikanga ko. Ekiaki i kuma kansolela mu kala se ntinu.
Kansi, Saulu ke nsukami ko ngatu muntu andwelo. Mu kanda dia kimvwama kawutukila. Mote mpe, nkwa ntel’anda. Wasunda wantu awonso o ntela muna Isaele. Ekesa dia muntu kakala ye nlundumuki ambote. O nkangu uyangalele wau vo Yave wasola Saulu se ntinu. Yau awonso bakazidi oku vo: ‘Yambula ntinu kazinga!’
Atantu a Isaele basaka o kumama. Bakwamanan’o bangika Aneyisaele. Vava Saulu kayadikwa se ntinu, Aneyamone bezidi kubanwanisa. Kansi, Saulu wakubika makesa mayingi yo sunda Aneyamone. O nkangu wayangalela Saulu nze ntinu au.
O Saulu wasundisa Aneyisaele vita zayingi muna mbeni zau. O Saulu wakala mpe yo mwana wakala yo unkabu nkumbu andi Yonatane. Wasadisa Isaele mu sunda vita zayingi. Afelesetia bakala se mbeni zantete za Aneyisaele. Lumbu kimosi mazunda mayingi ma Afelesetia bezidi nwanisa Aneyisaele.
O Samuele ovovese Saulu vo kavingila yavana kelwaka, kakela kimenga kwa Yave. Kansi, o Samuele ozingidi olwaka. O Saulu omwene wonga vo Afelesetia balenda yantika e vita. Muna diadi, okelele e kimenga yandi kibeni. O Samuele vava kaluaka, ovovese Saulu vo: Okolamene nkanikinu a Nzambi. ‘Yave osola muntu akaka kakala se ntinu a Isaele.’
Oku sentu o Saulu okolamene diaka. O Samuele umvovese vo: ‘Lemvokela Yave kusundidi o kunkelela kimenga kia mazi ma mameme. Wau vo kulemvokele Yave ko, o Yave kekuyambula ko wakal’aka se ntinu a Isaele.’
Diambu diamfunu tulongokele mun’elongi diadi. Ditusongele vo lemvokela nsiku mia Yave i diambu disundidi o mfunu. Ditulongele mpe vo muntu ambote nze Saulu olenda kwandi kituka se muntu ambi. Ka tukituki nkutu wantu ambi ko.
