VAVA Davidi kavonda Ngoleyate, o Abene wa mfumu a makesa ma Isaele unete kwa Saulu. O Saulu oyangalele kikilu muna Davidi. Unkitwidi se mfumu a makesa mandi yo zingila muna nzo andi.

I bosi, vava makesa bavutuka kuna vita akento bayimbila: ‘O Saulu ovondele mazunda mandi, o Davidi yazi kumi ya mazunda.’ O Saulu omwene kimpala, kadi zitu uvewanga kwa Davidi wingi ke mu yandi ko. Kansi, o Yonatane wa mwan’a Saulu kamona kimpala ko. Wazolanga kikilu Davidi, Davidi mpe wanzolanga. Ozevo, yau awole basilanene nsilu vo bekala kaka se akundi.

O Davidi nsiki ambote a kokolo kakala, o Saulu wazolanga wa nkunga miandi. Kansi, lumbu kimosi e kimpala kia Saulu kiamfila mu vanga diambu diambi. Ekolo Davidi kasikanga kokolo o Saulu obongele edionga diandi otubidi dio oku vo: “Yatobela Davidi muna yaka.” O Davidi ovengele dio. I bosi, Saulu otubidi diaka Davidi edionga. O Davidi i nzaya kazaya vo kafwete kuyikenga.

Nga osungamene nsilu wasia Saulu? Wavova vo ovana mwan’andi ankento kwa muntu ovonda Ngoleyate kakala se nkaz’andi. Kansi, o Saulu ovovese Davidi vo okumvana Mikale wa mwan’andi avo ovondele ntete 100 Afelesetia. Se badika ediadi! Saulu wavavanga vo Afelesetia bavonda Davidi. Kansi, ke banlenda ko. O Saulu i mpana kavana mwan’andi kwa Davidi.

Lumbu kimosi o Saulu ovovese Yonatane ye ntaudi zandi zawonso bavonda Davidi. Kansi, o Yonatane ovovese s’andi vo: ‘Kuvondi Davidi ko. Kasumukini ngeye ko, kadi mavangu mandi mambote kaka oku wina. Osidi o moyo andi vana koko vava kavonda Ngoleyate, ongeye wamwena dio e kiese.’

Saulu owidi nding’a mwan’andi, ovovele vo kevanga Davidi mbi ko. O Davidi ovutukidi sadila Saulu muna nzo andi una kateka kunsadila. Lumbu kimosi vava Davidi kasikanga kokolo o Saulu ovavidi tompola Davidi y’edionga. Owau i nkumbu atatu, o Davidi ovengele dio, edionga diele muna yaka. O Davidi omwene vo kafwete tina!

Muna fuku wauna o Davidi wele kuna nzo andi. Kansi, o Saulu otumini wantu benda kumvonda. O Mikale obakwidi makani ma s’andi. Ovovese nkaz’andi vo: “Ovo kuvuluza moyo aku o fuku wau ko, mbazi mene ovondwa.” O Mikale okulumwini Davidi vana zianela muna fuku wauna. Davidi wele tinina mwakaka-kaka, tezo kia mvu nsambwadi. O Saulu kasidi kunsolola ko.