E FWANISWA kiaki paradiso kisonganga nze una Nzambi kasonga kwa Yesaya wa ngunz’andi. Yesaya wazinga kunima Yona.

Paradiso in’e nsasa vo “mpatu.” Nga ke dikusungamesanga fwaniswa twateka mona mu nkanda wau ko? Ina nze mpatu ambote yina Yave wa Nzambi kakunina Adami yo Eva, nga ke wau ko? E nza nga ikituka kieleka se paradiso?

O Yave wavovesa Yesaya wa ngunz’andi mu soneka oma ma paradiso ampa eyi ikwiza, ikalwa kwa nkangu a Nzambi. Wavova vo: ‘E dievwa dinangina yo mwan’ememe kuna luvuvamu. Mwan’a ngombe yo mwan’a nkosi bedila vamosi, e kingyanangyana kikubafila. O nsedia osakanina nioka lembi tatikwa.’

Akaka nanga bevova vo, ‘ediadi ke dilenda vangama ko. Mpasi kala kaka zikala ova nza.’ Kansi, yindula edi: Nkia mpila mpatu kavana Nzambi kwa Adami yo Eva?

Nzambi mu paradiso kabasia. Muna kolamena Nzambi i bavidisila mpatu au ambote, banuna yo fwa. Nzambi osidi nsilu a vana elekwa ina yavidisa Adami yo Eva kwa ana bekunzolanga.

Muna paradiso ikwiza ke mukala muntu ko omwesa akaka e mpasi ngatu fwasa e nza. Luvuvamu lwakieleka lukala mo. Wantu awonso bekala yo vimpi wambote yo zinga mu kiese. Ikala nze una kazola o Nzambi kuna lubantiku. Tusinga longoka una Nzambi ketwasila paradiso.