TALA muntu muna maza. Mu mpasi kena, nga ke wau ko? E mbizi yoyo se ikumina. Nga ozeye nani i muntu ndioyo? Nkumbu andi Yona. Yambula twazaya nkia mpila kayisila mu mpasi zazi.

Yona ngunz’a Yave. Vava Elesa wa ngunza kafwa, o Yave ovovese Yona vo: ‘Wenda kuna Nineve, e mbanza yampwena, kadi o bi wau usakidi. Wenda kubavovesa wo.’

Kansi, o Yona kazolele ko. Okotele muna nzaza yayendanga kwakaka ke mu kwenda kuna Nineve ko. O Yave kayangalela evangu dia Yona ko. Ozevo, otwese tembwa kiangolo muna mbu. E nzaza se yidimuka. Ansau bamwene wonga, bakazidi konso muntu kwa nzambi andi.

O Yona ubavovese vo: ‘Yave wa Nzambi wavanga ezulu yo ntoto nsambilanga. Ntinini o vanga dina kantumini.’ Ansau banyuvwidi: “Aweyi tukuvanga, o mbu watulembamena?”

O Yona ubavovese vo: ‘Nuntuba muna mbu; i ndembamena ukunulembamena o mbu.’ Ansau ke bazola dio vanga ko. Kansi vava tembwa kiasaka e ngolo babongele Yona bantubidi muna mbu. Vana vau e tembwa kidingamene, o mbu mpe ulembamene.

Vava Yona kakota muna nsi a maza omininu kwa mbizi a maza ampwena. Kansi, kafwa ko. Okedi muna vumu kia mbizi mini ntatu yo mafuku matatu. O Yona okendalele kikilu muna lembi lemvokela Yave yo kwenda kuna Nineve. Nga ozeye dina kavanga?

Osambidi kwa Yave mu lomba lusadisu. O Yave ovovese mbizi a maza vo kaluka Yona kun’eseke. I bosi, o Yona wele kuna Nineve. Ediadi nga ke disonganga ko vo tufwete vanga mawonso kevovanga Yave vo twavanga?