ADIEYI dibwang’o vava? O wantu v’elambu diampwena bena. Ntinu a Babele obokelese ezunda dia wantu. Banwina muna mbungwa zawolo y’ezi zapalata zina zabongwa muna tempelo a Yave kuna Yerusaleme. Muna ntangwa ina, muvaikidi nlembo mia koko kwa muntu, miasoneka muna yaka. Yau awonso bamwene o wonga.

Belesasa wa ntekelo a Nebukandesa i wayalanga. O ntinu ovovele vo bantwasila akwa ngangu. Ubavovese vo: ‘Konso on’otanga sono kiaki, yo sasila kio otambula lekwa yayingi, okala mpe se nyadi antatu muna kintinu.’ Kansi ke vakala mosi ko mun’akwa ngangu walenda tang’e sono muna yaka ngatu sasila kio.

O ngudi a ntinu owidi mazu, wizidi kun’eseka di’elambu, ovovese ntinu vo: ‘Kuteleka moyo ko, vena yo muntu muna kintinu kiaku, ona wina yo mwand’a nzambi. Muna lumbu ya nkak’aku Nebukandesa wankitula se ntu muna akwa ngangu awonso. Nkumbu andi Daniele. Umbokela, okusasila yo.’

Vana vau batwese Daniele kwa ntinu. Umvene o tukau, o Daniele kazola to ko. I bosi unzaisi ekuma Nzambi kakatulwila kimfumu kwa Nebukandesa wa nkak’andi. Kadi ‘nkwa lulendo kakala, mu kuma kiaki o Yave wantumba.’

O Daniele umvovese vo: ‘Ongeye Belesasa, kana una vo wazaya mawonso mabwila Nebukandesa, kwasakidika ntim’aku ko. Watwasa mbungwa za tempelo a Yave yo nwina mo. Wasanisina nzambi zanti ye zamatadi, kwakembela Mvangi eto ko. Muna kuma kiaki o Nzambi wasindika nlembo mia koko mu soneka e sono yayi.

‘E sono kiasonama i kiaki,’ u kavova Daniele. “MENE, MENE, TEKELE, PERESE.”

‘MENE disongele vo o Nzambi otangidi kintinu kiaku osukisi kio. TEKELE disongele vo otezelo vana balanza, osolokele vo kwafwana ko. PERESE disongele vo e kintinu kiaku kikayilu, kivewa kwa Amadai ye Aparasi.’

O Daniele una kavoveleng’o mama, Amadai ye Aparasi bakota muna Babele. Babongele mbanza yo vonda Belesasa. E sono muna yaka yalungana muna fuku wauna. Kansi, adieyi dibwila Aneyisaele? Tusinga dio zaya. Kansi entete yambula twazaya dina diabwila Daniele.