TEZO kia mvu miole miavioka tuka Amadai ye Aparasi babakila nsi a Babele. Tala diambu dibwanga owau. Elo, Aneyisaele bavaikidi muna Babele. Aweyi bavaikidi mo? Nani ubavaikisi?

Kurese, wa ntinu a Parasa. O Kurese una kawutukidi ko, Yave wavovesa Yesaya wa ngunz’andi mu soneka mu kuma kiandi: ‘Ovanga zolela yame yawonso: O mavitu ke mezikama ko, wabaka e mbanza.’ Kurese wakala se ntu muna baka Babele. Amadai ye Aparasi bakota muna mbanza o fuku kadi mavitu maziuka makala.

Kansi, o Yesaya wa ngunz’a Yave wazayisa mpe vo o Kurese ovana nswa a tungulula Yerusaleme ye tempelo andi. O Kurese nga wavana nswa wau? Wavana wo. I wau wuwu kavov’o Kurese kwa Aneyisaele: ‘Nwenda kuna Yerusaleme nutungila Yave wa Nzambi eno e tempelo.’ I wau mpe bevanganga Aneyisaele awaya.

Kansi ke Aneyisaele awonso ko muna Babele bavutuka kuna Yerusaleme. Nkangalu anda wakala, ndonga muna yau ambevo yovo anunu bakala mu vanga nkangalu wa tezo kia 800 za kilometa. Vena mpe ye kuma yakaka balembi vutukila akaka. O Kurese ovovese ana ke bevutuka ko mu ‘vana palata yo wolo ye salanganu yakaka kw’awana bevutuka mu tungulula Yerusaleme ye tempelo andi.’

Ozevo, tukau twayingi twavewa kwa Aneyisaele ana bavutuka kuna Yerusaleme. O Kurese wabavana mpe malonga ye mbungwa zina kabonga Nebukandesa muna tempelo a Yave vava kafwasa Yerusaleme. Nkangu lekwa yayingi bakala yau mu nata.

Vioka ngonde ziya, Aneyisaele baluaka kuna Yerusaleme muna ntangwa yasilwa. Mvu lusambwadi tuka kiafwasilwa e mbanza yo lembi kalwa kwa wantu. Kana una vo Aneyisaele mu nsi a yau kibeni se bena, mpasi bemona nze una tumona mun’elongi dilanda.