TALA e salu kisalwanga ovava. Aneyisaele mu tunga bena e yaka ya Yerusaleme. Vava Nebukandesa wa ntinu kafwasa Yerusaleme se vioka mvu 152, wabwisa e yaka yo yoka mavitu ma mbanza. Aneyisaele ke batunga yaka vana vau ko vava bavutuka muna nsi au.

Nga olenda yindula una bamonanga o nkangu mu zingila mvu miami miawonso mu mbanza yakondwa yaka? Wonga bamonanga. Atantu au balenda kubakotela ye sazu kiawonso yo kubafwasa. Kansi, o Nekemiya mu sadisa kena nkangu mu tungulula yaka. Nga ozeye nani i Nekemiya?

Nekemiya mwisi Isaele wazingilanga muna mbanz’a Susani, mbanza ina bazingilanga Modekai yo Esete. Nekemiya kuna lumbu lwa ntinu kasadilanga, nanga, nkundi a Modekai yo Esete wa ntinu ankento kakala. Kansi, Nkand’a Nzambi ke uyikanga ko vo Nekemiya wasadila Akasurose wa nkaz’a Esete. Antakesate wa ntinu kasadila, ona walandila Akasurose.

Sungamena vo Antakesate ntinu ambote kakala. Wavana Ezera e nzimbu mu kwenda viengesa tempelo a Yave kuna Yerusaleme. Kansi, Ezera katungulula yaka ya mbanza ko. Yambula twatala una Nekemiya kasadila e salu kiaki.

Mvu 13 miavioka tuka Antakesate kavana nzimbu kwa Ezera mu kwenda viengesa tempelo. O Nekemiya se nembungwa wa Antakesate wa ntinu. I sia vo yandi wavananga vinyo kwa ntinu, yo lunga-lunga kalembi silwa ma kiampondi. Salu kiamfunu kasalanga.

Lumbu kimosi Kanani wa mpangi a Nekemiya y’akaka batuka muna nsi a Isaele bele kingula Nekemiya. Bamvovese vo Aneyisaele mu mpasi bezingilanga, e yaka ya Yerusaleme yakinu yafwasakana. Ediadi diakendeleka kikilu Nekemiya, muna kuma kiaki osambidi kwa Yave.

Lumbu kimosi o ntinu omwene vo Nekemiya wakendalala kakala, unyuvwidi vo: “O lose luaku nkia kuma lunin’oku ntantu?” Nekemiya umvutwidi vo mu kuma kia yiva kwa Yerusalame, e yaka yandi yamana bwa. O ntinu unyuvwidi vo: “Aweyi ozolele?”

Nekemiya ovutwidi vo: ‘Ungyambula ngyenda kuna Yerusaleme, yatungulula e yaka.’ Antakesate ntinu ambote. Ovovese Nekemiya vo kenda. Umvene nti muna vanga mielo mia tempelo y’emi mia yaka kia mbanza. Ke kolo ko, Nekemiya olweke kuna Yerusaleme. Ozayisi makani mandi kwa nkangu. Bayangalele mo yo vova vo: ‘Tuyantika o tunga.’

Vava atantu a Aneyisaele bamona vo e yaka yitelamene bavovele vo: ‘Twenda kubavonda yo ningamesa e salu kia tunga.’ Nekemiya vava kazaya wo ovene nsosolo ye madionga kw’asadi. Ubavovese vo: ‘Ke nubamoni wonga ko: nunwanina mpangi zeno yo wan’eno amakala y’amakento, y’akazi eno ye nzo zeno.’

O nkangu wakabuka kikilu. Konso muntu ye nwaninwa kiandi fuku yo mwini, yo kwamanana o tunga. Ozevo, vioka lumbu 52 e yaka kiamanisa o tungwa. Owau, nkangu uyangalele zingila muna mbanza yazungwa e yaka. Nekemiya yo Ezera balongele nkangu e diambu dia Nzambi, nkangu uyangalele kikilu.

Kansi, Aneyisaele ke bavutuka zinga ko nze una bazingilanga vava ke bayele ko kuna Babele nze abakami. Kwa ntinu a Parasa bayalwanga yo kunsadila. Kansi, Yave wasia nsilu vo osinga tuma ntinu ampa, ona otwasa luvuvamu kwa wantu. Nani i ntinu ndioyo? Aweyi ketwasila luvuvamu ova nza? Mvu 450 miavioka muna zaya diambu diadi. I bosi vawutuka mwana mosi wamfunu. Kansi, olwalu lusansu lwakaka.